ВМРО-ДПМНЕ ја продолжи „војната“ на зборови со семејството на екс-премиерот Зоран Заев за случајот „Рекет“. Најголемата опозициска партија тврди дека „никој повеќе не и верува на најкриминалната Далтон фамилија во Македонија“, откако Вице Заев, брат на поранешниот прв човек на владата, попладнево во отворено писмо до јавноста демантираше дека имал средби со Зоран Милески Кичеец додека тој е осомничен за „Рекет“.
Во целиот напис Вице Заев за една работа е во право, а тоа е дека вистината секогаш е посилна од лагата… Откако во Судот се презентираа докази каде што Вице Заев бил на работен состанок со Зоран Милески Кичеец и Зоран Заев бил на средба со Катица Јанева и повеќе од јасно е дека вистината излезе на виделина и конечно се знае кој стои зад случајот „Рекет.
стои во соопштението на ВМРО-ДПМНЕ.
Во соопштението до јавноста, освен што лично негираше такви средби, Вице Заев посочи и дека ниту еден член од неговото семејство немал средба со осомничените во случајот „Рекет“. Упати и повик до надлежните институции да ги проверат сите изнесени наводи, да ги објават сите снимки, видеа, аудиоматеријали, за како што рече, јавноста да се увери во вистината.
Во своето соопштение ВМРО-ДПМНЕ не се осврна на делот од ставот на Вице Заев во кој се бара објавување на спорните материјали. На соопштението на Вице Заев денеска претходеше и прес-конференција на потпретседателот на ВМРО-ДПМНЕ, Александар Николовски, кој обвини дека два дена нема реакција од Зоран Заев и Вице Заев за средбите со Катица Јанева и Зоран Милески-Кичеец.