Ковачевски и Груби се фатени во шема која смрди на корупција, која очигледно само на ЈО не ѝ мириса, реагираат од ВМРО-ДПМНЕ
Ковачевски и Груби се фалеа со странски надзор, а на крај промовираа договор со фабрика за гаќи. Постои ли дно кое не можат да го пробијат, прашуваат од опозициската ВМРО-ДПМНЕ во врска со надзорот на градбата на коридорите 8 и 10-д.
„Ковачевски и Груби ја срамат Македонија, даваат тендер за надзор на фирма која нема еден ден искуство, а лиценцата ја добива во сред постапка за поднесување пријави. Лага беа тврдењата на Ковачевски и Груби дека надзорот оди кај странски експерти. Две третини од парите одат кај фирмата за гаќи ‘Електра Солушн’ и ‘Евро Консалтинг’ на криминалец баран со меѓународна потерница. Единствени странци во проектот се еден државјанин на Хрватска, адвокат, двајца од Србија, инженери, еден од Црна Гора и директорот на ‘ИРД’ од Италија кој ќе се наплати над еден милион евра. Најголемиот број од петте странци се вклучени во преговорите со изведувачот, и не се за надзор, надзорот 99 отсто ќе се врши од страна на домашни лица. Лага е дека надзорот е скап заради странски експерти.“,
посочуваат од ВМРО-ДПМНЕ.
Оттаму потенцираат дека „Ковачевски и Груби се фатени во шема која смрди на корупција, која очигледно само на ЈО не ѝ мириса“.
Лидерот на ВМРО-ДПМНЕ, Христијан Мицкоски, вчера, во изјава за медиумите, рече дека изградбата на коридорите 8 и 10 е приоритет на партијата. Тој изјави дека ѝ стојат на располагање на американската компанија „Бехтел“ која заедно со „Енка“ ќе ги гради автопатиштата, но тоа, нагласи, треба да биде со вистински и законит надзор.
Како што објави „360 степени“, за надзорот над „Бехтел и Енка“ ќе се издвојат вртоглави суми – 300 илјади евра по преговарач, 20 илјади евра месечно за надзорен инженер.
Анализата на договорот што ја направи „360 степени“ покажува дека она што на јавноста ѝ се претставува како надзор од меѓународни експерти, всушност, е само завеса зад која доминантно стојат домашни кадри. Од 81 експерт, кои ќе бидат вклучени во надзорот, само петмина се странци, од кои четворица од земји од соседството.
Според документите, на четири лица од правниот тим за преговори за цената на чинење на градбата на автопатските делници им се дадени паушали од 300 илјада евра по човек, односно вкупно за четворицата државата ќе плати 1 200 000 евра.
Најголем дел од 22,3 милионскиот тендер одат кај „Електра солушнс“ или подизведувачите што ги ангажирале. Тоа се околу 8,3 милиони евра. Втора по „тежина“ е, исто така, македонската „Евро консалтинг“, на Бранислав Димитријевиќ за кого има обвинение во Ерменија – за чии услуги се наменети околу 7,1 милиони евра од тендерот. Од останатите пари, 4,1 милиони одат кај ИРД од Италија, додека услугите на локалната канцеларија на ИРД во Скопје ќе чинат околу 2,4 милиони евра. За последниот партнер во конзорциумот, шпанско-кинеската „Ептиса“, се предвидени 400 000 евра.