Лидерот на ВМРО-ДПМНЕ вели дека не очекува обвинителството да отвори случај, но порачува дека следната влада што ќе ја предводи неговата партија сигурно ќе се позанимава со тендерот за супервизија и надзор
Мицкоски рече дека изградбата на коридорите 8 и 10 се приоритет на ВМРО-ДПМНЕ. Тој вели дека ѝ стојат на располагање на американската компанија „Бехтел“ која заедно со „Енка“ ќе ги гради автопатиштата, но тоа, нагласува, треба да биде со вистински и законит надзор.
„ВМРО-ДПМНЕ овие коридори ги има како приоритет во својата програма и што се однесува до изведбата на истите, ние сме апсолутно тука и стоиме на располагање на реномираната компанија ‘Бехтел’ да помогнеме во реализација на овие два коридора, но на законски начин со вистински супернадзор и со вистинска помош коишто ги понудиме на компанијата бидејќи приоритет е изградба на патна инфраструктура. Приоритет е и на претходната и на следната програма ќе биде изградба на автопатско решение кое што ќе ги поврзе Прилеп, Битола со граничниот премин Меџитлија, кое што ќе ги поврзе Гостивар, Букојчани со Кичево, а потоа и до Охрид и до Ќафасан и до соседна Албанија. Така што изведбата на овој коридор никогаш нема да биде под знак прашање бидејќи е дел од приоритетите на ВМРО-ДПМНЕ, но на законит начин“,
изјави денеска Мицкоски од Битола.
Изјавата на лидерот на ВМРО-ДПМНЕ доаѓа по низата медиумски написи за сомнежите за дел од компаниите кои се дел од конзорциумот „ИРД инженеринг“ што го доби тендерот за надзор тежок 22 милиони евра.
Мицкоски порачува дека кога неговата партија ќе дојде на власт ќе има супервизија на компаниите кои ќе го прават надзорот бидејќи вели, некој не само што сака да украде народни пари туку и преку лажни количини ќе сака дополнителни провизии. Од обвинителството, пак, не очекува дека ќе се отвори случај.
„Не очекувам дека обвинителството ќе отвори случај. Не очекувам дека ова обвинителство и оваа власт ќе постапуваат. Но, ви ветувам дека следната влада на ВМРО-ДПМНЕ сигурно ќе се позанимава со тендерот за супервизија и надзор којшто практично има за задача да врши надзор на градежните работи и да ги потпишува градежните книги. А, врз основа на градежните книги ќе се исплаќаат пари од Буџетот во процесот на реализација на коридорот 8 и коридорот 10-д“,
рече Мицкоски.
Дел од конзорциумот „ИРД инженеринг“ кој го доби тендерот за надзор се две странски (италијанската ИРД и шпанската „Ептиса“) и две домашни компании („Електра солушнс“ и „Евро консалтинг“).
Иако ИРД на хартија е водечка компанија во конзорциумот, ако се погледне распределбата на над 22 милиони евра за надзор, сликата е поинаква. Како што објави „360 степени“ во понеделникот, најголем дел од милионскиот тендер одат кај „Електра солушнс“ или подизведувачите што ги ангажирале. Тоа се околу 8,3 милиони евра. Втора по „тежина“ е, исто така, македонската „Евро консалтинг“, на Бранислав Димитријевиќ за кого има обвинение во Ерменија – за чии услуги се наменети околу 7,1 милиони евра од тендерот. Од останатите пари, 4,1 милиони одат кај ИРД од Италија, додека услугите на локалната канцеларија на ИРД во Скопје ќе чинат околу 2,4 милиони евра. За последниот партнер во конзорциумот, шпанско-кинеска „Ептиса“, се предвидени 400 000 евра.
Друг интересен аспект кој го покажа анализа на „360 степени“ на договорот помеѓу „ИРД инженеринг“ и Јавното претпријатие за државни патишта, се имињата на експертите што ќе работат на надзорот, но и колку ќе чини нивната работа. Од 81 име, само пет се на странци од кои четворица од земји од соседството.
Исто така, анализата покажа и дека ангажман на петмина странци е со паушал од 300 илјади евра по човек.
Претходно, за една од фирмите кои се дел од надзорот – „Евро консалтинг“, „Призма“ објави дека еден од сопствениците, Бранислав Димитријевиќ, во Ерменија бил ангажиран како лидер на тим во француско-шпанскиот конзорциум „Савеж-Ептиса“ за голем инфраструктурен проект. Ерменското обвинителство, пак, има покренато обвинение за тој проект – „Развој и спроведување патен коридор Север – југ во периодот од 2009 до 2018 година“. Димитријевиќ, конкретно, таму се гони за кривично дело кое во ерменскиот закон гласи „извршена измама од голем обем“ (член 178, став 3, точка 1 од Кривичниот законик на Ерменија).
„Ептиса“, која учествувала во конзорциумот во Ерменија, а сега е дел од конзорциумот во Македонија, пак, веќе има своја историја и во земјава. За неа, ТВ Алсат-М објави дека Владата на 24 ноември 2020 година донела одлука со која на сите државни институции и општини им забранила да ја ангажираат на тендери над 1 милион евра поради незаконско, неетичко и неодговорно постапување во надзорот на работите на пругата Куманово – Белаковце. Меѓутоа, одлуката била укината на 9 февруари 2021 година.