На бизнисот итно му е потребна инјекција, свежи пари и помош, а не несериозни мерки, реагираат од опозициската ВМРО-ДПМНЕ.
Мерките што ги презема Владата ги нарекуваат смешни посочувајќи дека не решаваат ништо.
„Од брзината на имплементација на мерките зависи дали ќе се спречи економска катастрофа. Лавината отпуштања од работа веќе започна во неколку града. ВМРО-ДПМНЕ предлага итно замрзнување на обврските на компаниите кон државата чија работа е поврзана или е погодена со ситуацијата. Предлагаме и итно замрзнување на обврските за компаниите кон банките и заемодавателите, најмалку за март, а доколку е потребно и кризата продолжи, и за месец април“,
посочуваат од ВМРО-ДПМНЕ.
Тие бараат и државата да ги плати трошоците за вработените во компаниите што се погодени во висина од 50 проценти од вкупниот трошок за вработените.
Владата, пак, пред два дена ги презентираше првите мерки, а истите вчера се најдоа и на владината седница. Првата мерка, која според опозицијата е смешна, се однесува на можноста микро, малите и средните претпријатија да подигнат кредити од 3 до 30 илјади евра. Втората, пак, се однесува на давање субвенции на фирмите за плаќање на придонесите за вработените.