Се забранува собирање во група на повеќе од пет лица, во паркови и на други јавни места и јавни површини.
Оваа одлука е донесена на владината седница која се одржа попладнево.
„За оваа цел, се задолжуваат Министерството за внатрешни работи и Армијата да ги разбиваат овие групи и да ги интензивираат теренските контроли“,
соопштија од Владата.
Во вечерашното соопштение од Владата ги потврдија и мерките кои премиерот Оливер Спасовски ги објави во гостувањето во емисијата „Вин-вин“ на Телма ТВ, меѓу кои и таа дека се забранува пристап на лица и возила во парк шумата Водно секој ден, во период од 18 до 6 часот.
И за оваа мерка е задолжено МВР кое ќе треба со патролни возила да го забрани пристапот до Водно.
МВР доби задолжение и да ги интензивира контролите во приватните куќи и вили во кои се организираат забави и собири (во општина Сопиште и во населеното место Соње), со цел да се спречат ваквите настани. Кон сопственикот на куќите и присутните лица затечени во нив, наложи Владата, да се преземат соодветни законски мерки заради непочитување на мерките и препораките.
Уште една од одлуките која е донесена се однесува на забрана за одржување на наставата и спроведувањето на обуките и испитите во испитните центри од страна на автошколите, во период од 14 дена.
„Сите маркети, аптеки, банки и објекти кои даваат поштенски услуги, задолжително да обезбедат редарска служба при влез и во внатрешноста во овие објекти, со цел да се контролира влезот и бројот на лица во истите, така што ќе се обезбеди минимум потребното растојание од два метри помеѓу лицата пред и во објектите“,
соопштија од Владата.
Од Илинденска бр.2, упатија и препорака до работодавачите да го организираат во зависност од типот на работата да ја да организираат работа од дома, без да се наруши редовното и нормалното функционирање на институцијата.
Се ограничи извозот на пченица и брашно
Уште една одлука која произлезе е ограничувањето на извозот пченица и наполица и брашно од пченица. Тоа се ограничува до 30 април со можност за продолжување во зависност од состојбата со пандемијата од коронавирусот.
„Оваа одлука е усвоена со цел да не се нарушат состојбите на пазарот во земјата, и да се обезбедат доволни количини на брашно во земјата во услови на зголемена побарувачка на пазарот за овие производи, предизвикана со прогласувањето на пандемијата од СЗО и во услови на ограничен увоз на брашно од Србија“,
објаснуваат од Владата.
Првите економски мерки поминаа на владина седница
Од владината прес-служба соопштија и дека се усвоени информациите од економските ресори во Владата за мерки за справување со последиците од коронавирусот. Мерките, вчера ги презентираше и вицепремиерката Мила Царовска.
Првата мерка, се однесува на можноста микро, малите и средните претпријатија да подигнат кредити од 3 до 30 илјади евра.
- Микро компаниите, до 10 вработени, ќе може да подигнат кредит од 3 до 5 илјади евра;
- Малите компании со 10 до 50 вработени, ќе може да подигнат кредит од 10 до 15 илјади евра;
- Средните компании со 50 до 250 вработени, ќе може да подигнат кредит од 15 до 30 илјади евра.
Кредитите се бескаматни, со каматна стапка од нула проценти со грејс период од 6 месеци и рок на отплата од 2 години.
Втората мерка, пак, значи субвенции на компаниите за трошоците за вработените.
„Таа се однесува на поддршка за компаниите во делот на исплатата на плати со субвенционирање на придонеси за вработените во компании од секторите туризам, транспорт, угостителство и други погодени компании, за месеците април, мај и јуни од 2020 година, со субвенција на придонеси по вработен во висина до 50 проценти од просечна плата исплатена во 2019 година“,
посочуваат од Владата.
Услови за компаниите да ја користат оваа мерка се: да не го намалиле бројот на вработените под бројот на вработени во месец февруари од 2020; компаниите да не исплатиле дивиденда во текот на 2020; компаниите да не исплатиле награди или бонуси по влегување во сила на мерката.
Само компаниите што имаат остварено добивка од работењето во 2020 ќе ги вратат субвенциите за придонес во износ од 50 проценти од добивката пред оданочување.