Ваквата ситуација, според Стоилковски, е израз на самоволие за кое, како што истакна, мора да има одговорност
Цела држава десет дена се прашува што се случува со Хирургија, за денеска министерот на СДС/ДУИ, Илир Демири, да каже дека едноставно не знае што е проблемот и го сведе само на лоша миризба, реагираат од ВМРО-ДПМНЕ на денешната прес-конференција на министерот за здравство.
Од партијата, чиј став, односно реакција на прес-конференција ја изнесе портпаролот Наум Стоилковски, велат дека Демири за случајот со хируршките сали не побарал одговорност ниту од раководството, ниту од заеднички општи служби, а ниту лично тој не понел одговорност за, како што кажа Стоилковски, неговата неспособност.
„Едноставно откри дека никој од менаџерите не чувствувал одговорност за состојбите во Хирургија! Десет дена воздухот не бил компромитиран, само имал лоша миризба. Десет дена нема операции, салите се затворени, а министерот излегува во јавност без трошка срам затоа што нема одговор. Чувствувањето мирис, пријатен или непријатен, е субјективно чувство, а според Демири, анализите покажале некомпромитиран воздух, додека пак операции не се вршат 10 дена. А, по 10 дена нема одговор и не чувствувале вина ниту тој ниту неговите директори затоа што, како што вели, кусо време бил министер?“,
изјави портпаролот на ВМРО-ДПМНЕ.
Ваквата ситуација, според Стоилковски, е израз на самоволие за кое, како што истакна, мора да има одговорност.
„Хирургија, Клинички, столбот на македонското здравство го рушат во темел, а Илир Демири нема поим што се случува. Но затоа Илир Демири е доволно министер на СДС/ДУИ за да ги брани директорите и на Хирургија и на Токсикологија, и да држи политички говори со обвинувања кон ВМРО-ДПМНЕ за болницата во Лешок. Ова е вистинското лице на Илир Демири, но и вистинското лице на СДС/ДУИ. Одговорност мора да има и ќе има и лична, и морална, и политичка!“,
порача портпаролот на ВМРО-ДПМНЕ.
Министерот за здравство во техничката влада на денешната прес-конференција рече дека засега нема објаснување за непријатната миризба во хируршките сали во Клиничкиот центар „Мајка Тереза“. Тој информира дека странска фирма во Сојузна Република Германија до која денеска се испратени мостри ќе го утврдува квалитетот на кислородот и компримираниот воздух од централниот систем на Клиничкиот центар „Мајка Тереза“ поради чија „мистериозна“ непријатна миризба повеќе од една недела не работат хируршките сали на Клинички.
Дотогаш, како што изјави, ќе се вршат хируршки интервенции само кај итни и неодложни пациенти, а салите ќе се снабдуваат со кислород и компримиран воздух преку надворешни компресори кои се инсталирани во меѓувреме.
Другите полесни пациенти на кои им е потребна хируршка интервенција ќе се препраќаат во Клиниката „Св. Наум Охридски“ и во „8 Септември“.
Поради ваквиот случај, тој побарал и од обвинителството да спроведе истрага за случајот.
„Бидејќи е необјасниво, побарав од обвинителството да спроведе истрага и да се види што е реалната причина за проблемот. Додека не заврши испитувањето и додека не дојдат резултатите од анализите од Германија, Клинички центар ќе се служи со надворешни компресори“,
изјави Демири.
Министерот за здравство, меѓу другото, информира и дека го разрешил директорот на Клиниката за кардиохирургија, д-р Марјан Шокаровски, а за ваквата одлука наведе две причини.
Според податоците што стигнале до него, како што рече, имало 170 пациенти кои не се внесени регуларно во „Мој термин“ и немаат отпусно писмо или прилог кон умреница, а таквата бројка Демири вели дека може да ја промени и вредноста на исходот.
Другата причина за разрешување на директорот, според Демири, се крајно нарушените меѓучовечки односи во таа институција.
Освен Шокаровски, Демири рече дека денеска ја разрешил и раководителката на Програмата за превенција од кардиоваксуларни заболувања, Александра Ефтимова.