ВМРО-ДПМНЕ бара да се стопира финансирањето невладини организации за преземање мерки и активности за спречување на ширењето на ковид-19.
Од партијата информираат дека поднеле приговори до Државната комисија за спречување на корупцијата за прекршување на Изборниот законик и Законот за спречување на корупција и судирот на интереси.
„Откако ја злоупотребија вонредната состојба, сега го злоупотребуваат и процесот на изборите. Имено, на 1.7.2020 година, противзаконски во тек на официјална кампања на невладините организации им се префрлаат парите од огласот. Затоа денес поднесовме приговор до ДКСК да постапи за прекршување на членот 8-а од Изборниот законик и член 34 од Законот за спречување на корупцијата и судирот на интереси. Ја повикуваме ДКСК веднаш да реагира во однос на приговорот“,
велат од ВМРО-ДПМНЕ.
Оттаму побараа да се суспендира постапката за доделување средства на граѓански организации и да се направи истрага за тоа кој и по кој основа добил грант од Владата.
„Власта на СДСМ префрла половина милион евра во ек на изборна кампања на НВО, a Државната комисија за спречување на корупција молчи.СДСМ најпрвин ја злоупотребија вонредната состојба и во брза постапка ги распредели средствата на НВО кој е близок до нив. За недела дена распишаа оглас, извршија евалуација и доделија над половина милион евра. ДКСК не најде за сходно да реагира и да види како тоа за 48 часа, колку што изнесуваше рокот за евалуација и избор на проектите, Комисијата која одлучувала за распределување на средствата да прочита над 550 проекти, со над 5.500 пишани страни материјал?! И дали ваквата „брзина“ во избор не ги заинтересира дали зад тоа не се крие веќе однапред договорена работа, кој и колку средства треба да добие?!“,
велат од ВМРО-ДПМНЕ.
Инаку, Антикорупциската комисија минатиот месец информираше дека ќе направат увид и во одлуката за финансирање на невладините организации од страна на државата за спроведување мерки за заштита од ковид-19.
Дополнително, најавија дека ќе ги истражат и првиот сет мерки на Владата за помош на фирмите за надминување на кризата.