Портпаролката на Владата, Марија Митева, ги повика сите засегнати семејства на повредените во пожарот во Кочани да ја искористат оваа можност и да се јават на телефонската линија 070 270 370 за да ги добијат сите потребни детали
Владата на утрешната седница ќе донесе одлука за организирање и обезбедување превоз и сместување на семејствата на повредените од трагедијата во Кочани кои во моментов се пренесени на лекување во други земји, информираше владината портпаролка Марија Митева на денешната прес-конференција.
Во вакви моменти, како што рече Митева, семејствата не треба да се грижат за логистиката или финансиските оптоварувања кога им се најпотребни на своите најблиски.
„Затоа, Владата ќе ја преземе одговорноста за покривање на трошоците за транспорт и сместување, обезбедувајќи им на семејствата да бидат покрај своите најблиски“,
рече Митева на прес-конференцијата во Владата.
Таа ги повика сите засегнати семејства на повредените во пожарот во Кочани да ја искористат оваа можност и да се јават на телефонската линија 070 270 370 за да ги добијат сите потребни детали, за потоа, како што рече, Владата да може ефикасно да ја организира поддршката што им е потребна и да го олесни ваквиот процес.
Дополнително, владината портпаролка најави дека Владата ќе соработува со Црвениот крст на Скопје за управување со официјалната сметка за донации. Оваа одлука, како што рече Митева, е донесена од неколку причини – главно, да постои единствена, официјална сметка за донации, за да не постојат дилеми каде и како се донира. Со ова, додаде владината портпаролка, се осигурува дека секој придонес оди таму каде што е потребно.
„Понатаму, спречување на злоупотреба и конфузија – за жал, во тешки времиња, дезинформациите може да се шират и сакаме да спречиме каква било несигурност околу каналите за донации. Доверба и транспарентност Црвениот крст веќе има досие за управување со ваква помош“,
додаде Митева.
Истакна дека во вакви времиња постојат две цели – силна борба и одоговорност за секој кој на каков било начин е одговорен и издигнување на човештвото над сè друго.