Со ова, како што информираат оттаму, се поништува одлуката на претходното владино раководство кое дало одобрение на проектот за основање на факултетот и покрај тоа што не ги исполнувал законските услови што, пак, е констатирано од надлежните институции по ревидирање на текот на постапката
Меѓународниот универзитет во Струга нема да може да основа Факултет за здравствени науки – одлучи Владата на денешната прва седница. Со ова, како што информираат оттаму, се поништува одлуката на претходното владино раководство кое дало одобрение на проектот за основање на факултетот и покрај тоа што не ги исполнувал законските услови, што, пак, е констатирано од надлежните институции по ревидирање на текот на постапката.
„Со оглед дека станува збор за регулирана професија согласно Директивата на Европската комисија 2005/36 и 2013/55, потребни се темелни и исцрпни анализи пред пристапување кон давање на Одобрение за вршење на високообразовна дејност за образование на овој тип на кадар. Во конкретниот случај, не се направени анализи за потребите од ваков кадар и условите за нивно образование и обука, ниту, пак, се извршени консултации со релевантни здруженија и надлежни органи по тој повод“,
се наведува во соопштението на Министерството за образование и наука.
Поради бројните и сериозни недоследности, посочуваат од МОН, Одборот за акредитација го поништи решението со кое се акредитира проектот за основање на факултетот, а Министерството го поништи решението за почеток со работа донесено од претходниот министер.
Акредитацијата на проектот за основање на Факултет за здравствени науки на Меѓународниот универзитет во Струга беше поништена од Одборот за акредитација на високото образование минатиот понеделник, со што, како што информираа оттаму, се поништуваат и сите други правни дејства во врска со почеток со работа на Факултетот.