Како што информираат од Владата, средствата од кредитната линија за претпазливост и ликвидност се наменети за поддршка на Буџетот на државата
Министерството за финансии на 10 октомври соопшти дека Мисијата на Меѓународниот монетарен фонд (ММФ) дала зелено светло за доделување 530 милиони евра на Северна Македонија преку Кредитната линија за претпазливост (The Precautionary and Liquidity Line – PLL) во рок од 24 месеци
Владата на денешната 99. седница го усвоила текстот на барањето до Меѓународниот монетарен фонд за земање кредит од 530 милиони евра, пари кои, како што се наведува во соопштението, се наменети за поддршка на Буџетот на државата.
„Владата го усвои текстот на барањето до Меѓународниот монетарен фонд, за обезбедување Кредитна линија за претпазливост и ликвидност. Кредитната линија за претпазливост и ликвидност е во износ од 530 милиони евра. Средствата од кредитната линија се наменети за поддршка на Буџетот на Република Северна Македонија“,
се наведува во соопштението од Владата.
Инаку, на 10 октомври, Министерството за финансии соопшти дека Мисијата на Меѓународниот монетарен фонд (ММФ) дала зелено светло за доделување 530 милиони евра на Северна Македонија преку Кредитната линија за претпазливост (The Precautionary and Liquidity Line – PLL) во рок од 24 месеци.
„По финалното одобрување на овој инструмент од страна на Бордот на ММФ, кое се очекува подоцна во текот на овој месец, на нашата земја веднаш ќе и бидат ставени на располагање 110 милиони евра за финансирање на буџетските потреби и за полесно соочување со шоковите кои ги донесе енергетската и ценовната криза. Самата намена на инструментот е да пружи ликвидносна поддршка на здрави економии во време на шокови и кризи, каква што е тековната глобална ситуација“,
информираат тогаш од Министерството.
Премиерот Димитар Ковачевски во своето гостување во емисијата „360 степени“ на 14 октомври на прашањето дали кредитот од ММФ доцнеше поради забелешки од влијателна земја членка на ЕУ и на НАТО за некомпетитивната процедура во која државата влегува во договор со американско-турскиот конзорциум „Бехтел и Енка“ за изградба на неколку автопатски делници, одговори дека е нормално сите проекти што ги има државата се разгледуваат од ММФ, а она што е важно за проектот за коридорите 8 и 10 е дека тие се уверија дека тој ќе биде направен врз основа на анализа на независна консултантска куќа која треба да биде советник на Владата.
Во средата Владата на седница го донесе предлог-буџетот за 2023 година и наредниот период тој треба да се најде на разгледување пред пратениците. Вкупните приходи во него се планирани на ниво од 282 милијарди денари (околу 4,6 милијарди евра), а расходите се проектирани на 324,8 милијарди денари (5,3 милијарди евра). Со вакви приходи и расходи, дефицитот е проценет на 42,75 милијарди денари (700 милиони евра).
Дополнително Владата на денешната седница донела одлука за продолжување на владиното субвенционирање на сметките за топлинска енергија на домаќинствата, со цел „заштита на домаќинствата од повисока цена на топлинска енергија, како што беше случај и досега“.
„Мерката за финансиската поддршка е предвидено да се реализира согласно меѓусебните права и обврски утврдени со склучени договори помеѓу Акционерското друштво за производство на електрична енергија Електрани на Северна Македонија, во државна сопственост, Скопје и носителите на лиценца за снабдување со топлинска енергија на подрачјето на градот Скопје. Мерката се однесува на временскиот период од денот на влегувањето во сила на оваа одлука – до истекот на рокот на утврденото постоење кризната состојба во снабдувањето со топлинска енергија“,
информираат од Владата.
На денешната седница, на предлог на Министерството за внатрешни работи, Владата ја разгледала и усвоила Информацијата во врска со потребата од склучување на Меморандум за разбирање помеѓу Владата на Северна Македонија и Швајцарскиот Федерален совет, за воспоставување на партнерство за миграција и го прифатила усогласениот текст на Меморандумот. Склучувањето на овој Меморандум, според објаснувањето од МВР, ќе придонесе во унапредувањето, продлабочувањето и проширувањето на дијалогот во областа на миграцијата, појаснуваат од Владата.