Со измени на Законот за јавни набавки, ќе се овозможи плаќање аванс поголем од 20 проценти од цената и ослободување од обврската за обезбедување банкарска гаранција во тендерите што се поврзани со справувањето со епидемии
Патниците од Велика Британија и од Ирска, што транзитираат, ќе имаат обврска да ја напуштат земјава во рок 24 часа
Еднократна парична награда ќе добијат и вработените од Специјалниот завод во Демир Капија
Владата, на денешната седница, ја разгледа и ја усвои Информацијата за вакцинацијата против ковид-19 и ги задолжи Министерството за внатрешни работи, Агенцијата за лекови и медицински средства (МАЛМЕД), Царинската управа, во рок од седум работни дена, да изготват и достават до Министерството за здравство сопствени акциски планови (активност, надлежна внатрешна организациона единица, овластено лице/овластени лица, рокови) и стандардни оперативни процедури за прием, физичко обезбедување, чување, дистрибуција и аплицирање на вакцините против ковид-19, согласно со нивната надлежност и улога во спроведувањето на Националниот план за вакцинација против ковид-19.
Владата му препорачува на ТАВ Македонија ДООЕЛ Скопје, во рок од седум работни дена да изготви и достави до Министерството за здравство сопствен акциски план и стандардни оперативни процедури за прием, физичко обезбедување, чување, дистрибуција и аплицирање на вакцините против ковид-19. Министерството за финансии и Бирото за јавни набавки, пак, во соработка со Министерството за здравство, во рок од пет дена треба да изготват предлог-измени на Законот за јавните набавки, со што ќе се овозможи плаќање на аванс поголем од 20 проценти од цената и ослободување од обврската за обезбедување банкарска гаранција за авансно плаќање во постапките за јавни набавки, директно поврзани со справувањето со епидемии и пандемии на заразни болести.
На оваа седница, Владата ја дополни одлуката за спречување на ширењето на ковид -19, со обврска за секој патник од Велика Британија и Северна Ирска што влегува во земјата на кој било граничен премин, задолжителниот карантин во домашна изолација да ги спроведува врз основа на изјава што ќе ја пополнува на граничниот премин, при влез во земјата. Патниците што транзитираат, пак, имаат обврска да ја напуштат земјата во рок 24 часа.
На денешната седница Владата донесе заклучок да ги прифати предлозите на Министерството за одбрана и на Министерството за труд и социјална политика за исплата на еднократна парична награда на медицинските работници од МО, кои се вклучени во лекувањето на болните од ковид-19, како и на вработените од Специјалниот завод за лица со попреченост во Демир Капија, кои, грижејќи се за штитениците, неколку недели беа вон своите домови.
„Владата ја измени и дополни одлуката за одобрување средства од буџетот за 2020 година во висина од 26.868.500 денари на јавни комунални претпријатија кои се членки на Здружението на комунални дејности при Стопанската комора за поддршка на нивното работење, како еднократна финансиска помош, со цел надминување на тешката материјална состојба на вработените“,
се додава во соопштението од владината седница.