За време на полицискиот час, кој во сабота и во недела ќе почнува од 16 часот и ќе трае до 5 часот следното утро, производствените погони и фабрики го продолжуваат своето производство организирано во смени.
Според одлуката на владиниот Главен координативен кризен штаб, работниците во време на забраната за движење ќе може да одат на работа само со посебни дозволи за сменска и ноќна работа. Тоа се истите дозволи што се издаваат на образецот усвоен од страна на Кризниот штаб, а ги издаваат самите одговорни лица на компанијата.
Дозволата содржи: основни податоци за работникот, адресата на живеење, но и работното место и називот на компанијата во која работи и се наведува и смената во која е ангажиран. Таа ќе биде потврда за движењето на работникот во време на полициски час и ќе треба да се приложи на увид на органите на државата.
Во соопштението од владината прес-лужба се упатува и апел до компаниите што работат во смени и за време на полицискиот час да покажат одговорност, да се придржуваат и да ги почитуваат мерките за заштита на работниците во услови на епидемија од ковид-19, а инспекциските служби ќе го следат почитувањето на препораките.
Тие препораки се:
-Во погоните каде што непосредно се врши производниот процес да се лимитира бројот на вработени до таа мера да работниците бидат на растојание од 1,5 до 2м.
-Во самиот погон задолжително да се обезбеди средство за дезинфекција нa раце и работни површини.
-За време на работното време од страна на вработените да се почитуваат општите препорачани мерки за повисоко ниво на лична и општа хигиена.
-Да се врши почесто проветрување на работните простории, односно повеќе пати во текот на денот и доколку е тоа можно (преку природна и вештачка вентилација).
-Еднаш неделно да се врши дезинфекција на сите работни простории, особено во погоните, од овластена служба за тоа.
-Во случај на непосреден контакт со позитивен лабораториски потврден случај на ковид-19 (со или без симптоми), лицето веднаш да се изолира и се пријавува до надлежен Центар за јавно здравје.
-Да се избегнува контакт на вработените лица од погоните меѓу себе во текот на работниот процес, а особено со административните службеници.
-Во случај на потреба од административна работа, потпишувањето на хартиени документи да се спроведува исклучиво преку едно одредено лице кое носи лична заштитна опрема на себе (заштитна маска и ракавици).
-Лицата задолжени за обезбедување на објектот да носат исто така лична заштитна опрема.
– Возачите кои дистрибуираат готови производи, репроматеријали, хартиени документи, исто така да носат лична заштитна опрема.
– Да не се одржуваат состаноци/колегиуми и тие да се спроведуваат по телефон или на мејл.