Владата ги повика МВР и Јавното обвинителство веднаш да ги расчистат бруталните закани и родово базираните повици на насилство кон допиничката на МИА од Брисел Тања Милевска, која деновива на социјалните мрежи беше изложена на закани, напади и говор на омраза.
Од Владата упатија најостра осуда на нападите со говор на омраза врз новинарката Тања Милевска и врз кој било друг новинар и граѓанин воопшто, истакнувајќи дека Владата цврсто стои зад слободата на говор и слободното новинарство и има нула толеранција за заплашување и закани кон новинарите.
„Безбедно известување и слобода на мисла, говор и делување во медиумите е наша суштинска, сегашна и долгорочна заложба, на која посветено работиме. Родово базираното насилство е друг, но подеднакво важен општествен проблем на кој сите заеднички и солидарно треба да му се спротивставиме и со кој ќе се избориме“,
се вели во владиното соопштение.
Претходно осуда на нападите врз новинарката Милевска стигна и од Европската Комисија.