Од Владата посочуваат дека внимателно ги следат случувањата во Израел преку Министерството за надворешни работи, кое е во редовен контакт со македонската амбасада во Тел Авив
Со вчерашниот чартер-лет на релација Тел Авив – Скопје, евакуирани се сите македонски граѓаните кои побарале помош да го напуштат Израел, велат од Владата.
Оттаму велат дека Владата го платила летот откако со одлука обезбедила пари од резерви на Буџетот. Објаснуваат и зошто летот се реализирал со авион на „Ер Србија“.
„Летот беше реализиран во соработка со ‘Ер Србија’, и тоа во услови на откажани летови и целосно блокиран авионски сообраќај од и кон Израел. Со оглед на тековните борбени активности во повеќе подрачја во Израел изминатата недела, претходните обиди за обезбедување на лет од Тел Авив не вродија со резултат, имајќи предвид дека ниту една компанија од регионот не беше во можност да обезбеди сигурен и безбеден лет и да одговори на барањата на Владата на Република Северна Македонија. На иницијатива на премиерот, Димитар Ковачевски, и во директен контакт со премиерката на Србија, Ана Брнабиќ, се изнајде решение на предизвикот за обезбедување чартер лет за граѓаните од регионот“,
соопшти Владата.
Со вчерашниот лет во Скопје пристигнаа 67 наши државјани, а со истиот лет бил обезбеден трансфер на седум албански, седум црногорски и тројца бугарски државјани. Солзи, прегратки и емотивни сцени доминираа на скопскиот аеродром по пристигнување на евакуираните граѓани.
„Амбасадата во Тел Авив, од самиот почеток на кризата е во контакт со државјаните на Република Северна Македонија, а дел од граѓаните кои се затекнаа во Израел, веќе се вратени во земјата на повеќе начини, меѓу другото и со специјални летови на пријателските држави на Република Северна Македонија“,
се вели во владиното соопштение.
Од Владата посочуваат дека внимателно ги следат случувањата во Израел преку Министерството за надворешни работи, кое е во редовен контакт со македонската амбасада во Тел Авив.