Солзи, прегратки и емотивни сцени попладнево доминираа на скопскиот аеродром каде што пристигнаа евакуираните македонски граѓани од Израел
Беше навистина страшно таму, ситуацијата е лоша. Ова со солзи во очите и растреперен глас за камерата на „360 степени“ го изјави македонска државјанка која беше дел од евакуираните граѓани од Израел.
„Јас бев на работа во Израел. Таму каде што работевме немаше ништо, ама таму каде што живеев се слушаа пукотници. Не чекавме многу за евакуација, дојдоа, нè зедоа и веднаш дојдовме на авионот. Сè беше добро“,
сведочи македонската државјанка за „360 степени“.
Солзи, прегратки и емотивни сцени попладнево доминираа на скопскиот аеродром каде што пристигнаа евакуираните македонски граѓани од Израел.
Превозот со чартер-лет, на релација Тел Авив – Скопје, беше организиран согласно одлуката донесена од страна на Владата заради евакуација на сите државјани на Република Северна Македонија кои сакаа да го напуштат Израел и побараа да се вратат во Северна Македонија.
Како што соопштија вчера од Владата, во услови на целосно откажани летови и блокиран авиотранспорт со Израел, предизвикот за организирање на овој чартер-лет е надминат преку соработка со „Ер Србија“, а трошоците за летот ќе бидат покриени од Буџетот.