Екипа на „360 Степени“ се наоѓа на аеродромот во Скопје, од каде што со фотографии и видеа ја пренесуваат сликата од пристигнувањето на македонските државјани
Македонските државјани кои беа евакуирани од Израел пристигнаа денеска нешто по 15 часот со бесплатен авионски превоз на Меѓународниот аеродром „Скопје“.
Превозот со чартер-лет, на релација Тел Авив – Скопје, беше организиран согласно одлуката донесена од страна на Владата заради евакуација на сите државјани на Република Северна Македонија кои сакаа да го напуштат Израел и побараа да се вратат во Северна Македонија.
Како што соопштија вчера од Владата, во услови на целосно откажани летови и блокиран авиотранспорт со Израел, предизвикот за организирање на овој чартер-лет е надминат преку соработка со „Ер Србија“, а трошоците за летот ќе бидат покриени од Буџетот.
Екипа на „360 Степени“ се наоѓа на аеродромот во Скопје, од каде што со фотографии и видеа ја пренесуваат сликата од пристигнувањето на македонските државјани.
На нивните лица веднаш се забележува замор, а пречекот со блиските роднини е емотивен и проследен со солзи радосници.
