Повикувајќи се на информациите со кои располага, премиерот рече дека обвинителот бил соучесник во процесот
Откако на Марковски му беше вратен пасошот, тој завчера ја премина границата со Србија на преминот „Табановце“. Како што објави „360 степени“, бизнисменот бил задржан на граничниот премин, но по извршените проверки му било дозволено да ја напушти државата бидејќи против него немало активна мерка за забрана за преминување на границата
Во случајот со враќањето на пасошот на битолскиот бизнисмен и почесен конзул на Белорусија во земјава, Борче Марковски, постои груба манипулација од локален јавен обвинител од Вишото јавно обвинителство во Битола.
Ова денеска го изјави премиерот Христијан Мицкоски при посетата на Клиничката болница во Битола како одговор на новинарско прашање кој е неговиот став за враќањето на пасошот на Марковски, кој е еден од обвинетите за случајот со РЕК „Битола“.
Според информациите со кои располага, Мицкоски рече и дека обвинителот е соучесник во процесот.
Инаку, случајот се актуализира откако на Марковски му беше вратен пасошот, по што тој завчера ја премина границата со Србија на преминот „Табановце“. Како што објави „360 степени“, бизнисменот бил задржан на граничниот премин, но по извршените проверки му било дозволено да ја напушти државата бидејќи против него немало активна мерка за забрана за преминување на границата.
Претседателот на Основниот суд Струга во заминување од судиската функција поради исполнување на условите за старосна пензија, Вулнет Винца, вчера потврди дека тричлен кривичен совет одлучил да му го врати пасошот на бизнисменот Марковски.
Премиерот посочи дека вчера го следел случајот и се заинтересирал за него.
„Мислам дека тука има груба манипулација од еден локален јавен обвинител во Вишото јавно обвинителство кој е соучесник во овој процес. И тоа нема така да заврши“,
кажа тој.
На дополнително новинарско прашање за името на обвинителот, премиерот рече дека не сака открива оти, како што рече, допрва ќе следува истрага за овој процес.
„Ако сакав да кажам име и презиме, ќе кажев. Не сакам да шпекулирам со имиња и презимиња. Допрва ќе следува истрага за овој процес“,
рече тој,
Според него, извештајот на надлежното основно јавно обвинителство се разликува од записникот што бил доставен од Вишото јавно обвинителство во Битола.
Според него, извештајот на надлежното Основно јавно обвинителство (ОЈО) е поинаков од тој кој е приложен како записник од страна на Вишото јавно обвинителство во Битола.
„Ова нема така да заврши. Ова лично јас го гарантирам и лично ќе го следам овој процес“,
додаде Мицкоски.
Винца не чувствува одговорност за одлуката за пасошот на Марковски
Претседателот на Основниот суд Струга во заминување, Вулнет Винца, кој вчера беше разрешен од функцијата врз основа на исполнување на старосни услови за пензија, во изјава за „360 степени” потврди дека тричлен кривичен совет одлучил да му го врати пасошот на бизнисменот Борче Марковски.
Тој вели дека не чувствува одговорност оти пред да одлучат добиле позитивно мислење од Јавното обвинителство.
„Ние ценевме, ама добивме мислење од овластениот тужител, ОЈО Струга. Не чувствувам одговорност. Имаме закажано рочиште на 2 септември. Ако не се врати, ќе му се суди во отсуство и ќе се одземе имотот“,
рече тој.
ОЈО Струга – против, Вишото обвинителство Битола – за
Од Обвинителството вчера соопштија дека, во конкретниот случај, барањето за укинување на дополнителните мерки за претпазливост изречени при определувањето на гаранцијата е поднесено од одбраната на обвинетиот.
„Надлежниот јавен обвинител од Основното јавно обвинителство Струга првично на 15.6.2026 година даде негативно мислење за прифаќање на ова барање. Откако одбраната поднела ново барање, јавниот обвинител го реферирал предметот во Вишото јавно обвинителство Битола. Од реферирањето е изготвен записник, при што Вишиот јавен обвинител донел заклучок со кој понискиот јавен обвинител го задолжил да поднесе позитивно мислење да се уважи предлогот на одбраната за враќање на привремено одземената патна исправа“,
велат оттаму.
Како аргументи за ваквата одлука, Вишиот јавен обвинител изнесува став дека со определената гаранција се исклучени околностите кои укажуваат на опасност од бегство на обвинетиот.
„Воедно се прифаќаат аргументите на одбраната дека обвинетиот поседува фирма во Република Србија чие работење е сериозно доведено во прашање и постои можност да биде нанесена ненадоместлива штета доколку тој во најкраток можен рок не отпатува таму за да потпише документација во врска со работењето на фирмата.
се посочува во соопштението од Обвинителството.
Сите аспекти на ваквата одлука и соодветната аргументација ќе бидат испитани. Во моментов не може да се смета дека обвинетиот е во бегство и тој има обврска да се јавува пред судот“,
За случајот
Марковски и седум други лица беа осомничени за кривични дела поврзани со јавна набавка за дислокација на погонски станици од ТЕЦ „Осломеј“ во РЕК „Битола“.
Иако опремата воопшто не се планирала за во Битола, бил спроведен тендер, потпишан договор во висина од околу 1,7 милиони евра, а неговата компанија „Марковски компани“ како добитник ги демонтирала машините од Кичево, ги донела во Битола и ги оставила немонтирани во кругот на РЕК „Битола”.
Судењето, кое првично започна во Основниот суд во Битола, во меѓувреме беше префрлено во Основниот суд во Струга, по одлука на Апелацискиот суд во Битола. Првото рочиште во Струга, закажано за 24 јуни, беше одложено бидејќи еден од обвинетите го сменил адвокатот, кој побарал дополнително време за увид во обвинителниот акт.
Новиот обид за почеток на судењето е закажан за 2 септември.
