На 18 мај истекува рокот за завршување на оваа обврска на државните, општинските и јавните институции и претпријатија
Државните, општинските и јавните институции и претпријатија да ги интензивираат активностите за отпис на каматите и за репрограмирање на долговите, стои во заклучокот од последната владина седница.
Сите државни органи, органите на државната управа, организациите утврдени со закон, органите на општините, на градот Скопје, како и акционерски друштва во државна сопственост, јавните претпријатија во државна или јавна сопственост, кои се утврдени како доверители во извршните исправи, дадени за извршување пред извршителите, заклучно со 31 декември 2017 година, треба да ги интензивираат активностите за отпис на каматите и за репрограмирање на долговите, согласно со закон, со оглед на тоа што рокот за тоа истекува на 18 мај 2020 година.
Владата, на последната седница, ја разгледа информацијата за примената на Законот за отпис на каматите и репрограмирање на долгови и трошоци на физичките лица. Министерството за правда е задолжено да ги извести извршителите во законски предвидениот рок за прецизираните барања за извршувања, се наведува во денешното соопштение од Генералниот секретаријат на Владата.