Од Венеција денеска ќе пристигнат 180 македонски државјани со организиран лет и ќе поминат 21 ден во државен карантин во хотелот „Дрим“ во Струга.
Пристигнувањето се очекува во 14 часот на скопскиот аеродром, а организиран ќе биде превоз и до задолжителниот карантин. Сите граѓани што се враќаат од странство отсега ќе треба да бидат во карантин од 21 ден, согласно новата одлука на Владата.
„Секој македонски граѓанин, кој се враќа во нашата земја со превозот организиран од Владата, има обврска самостојно да го плати авионскиот лет и за веќе утврдената процедура запознаени се сите патници. Сместувањето во државен карантин е во строго контролирани и безбедни услови, без никаков финансиски надомест. Како и досега, нашите државјани кои ќе допатуваат од Италија, Венеција, од аеродром до локацијата за државен карантин ќе бидат превезени со безбеден и строго контролиран автобуски превоз“,
информира Владата.
Автобусите се со дезинфицирана внатрешност од страна на сертифицирана компанија, обезбедени со полициска придружба, а возачите се со целосна заштитна опрема и скафандери. За граѓаните има обезбедено вода и закуска.
