Екипажот и патниците да носат заштитни маски, да се одржува физичко растојание пред чекирање, како и при влегување и излегување од авион, а на летови каде што ќе има можност ќе се обезбеди и оддалеченост помеѓу седиштата на патниците, предвидуваат новите дополнителни мерки за хигиена што ќе ги применува од 1 мај нискобуџетната авиокомпанија „Визер“.
„За да се осигура дека здравјето и благосостојбата на патниците и екипажот останат непроменети, ‘Визер’ воведува нови протоколи, во согласност со владините регулативи, да се почитува физичкото растојание за време на чекирање и да се подобри хигиената за време на летот. Како дел од мерките за заштита на здравјето на патниците и екипажот на авиокомпанијата, патниците треба да се чекираат и да ги купат сите дополнителни услуги онлајн, како на пример плаќање дополнителни торби, за да ја намалат интеракцијата на аеродромот. Употребата на киосците за самостојно оставање багаж – таму каде што е достапно – и брзите ленти за безбедност на аеродромите, се препорачани од страна на авиокомпанијата за понатаму да се обезбеди и физичко растојание пред чекирање во авионот, како и при влегување и излегување од авионот“,
соопштија од авиокомпанијата.
Оттаму дополнуваат дека иако ХЕПА-филтрите на сите нивни авиони филтрираат до 99,7 проценти од вирусите и бактериите од воздухот во кабината, екипажот и патниците ќе треба да носат маски за време на летот.
„Екипажот ќе им обезбеди на сите патници марамчиња за бришење, а воедно ќе бидат отстранети магазините и се советува да се применува бесконтактно плаќање при купување за време на летот, како мерки за да се намали физичкиот контакт. На летови каде што ќе има можност, екипажот ќе обезбеди и оддалеченост помеѓу седиштата на патниците“,
наведуваат од „Визер“.
Поради кризата со ковид-19 авиосообраќајот во земјава е прекинат и двата аеродрома се затворени. Засега нема најави кога би можело да се очекува нормализација на авиосообраќајот. Дотогаш во мирување е договорот за субвенционирани летови на оваа авиокомпанија со Владата.