fbpx
Свет

(ВИДЕО) Жртви и штети од силниот земјотрес во Измир

360степени | 30 октомври, 2020 16:10

Земјотресот со јачина од 6,6 степени според Рихтеровата скала разурнал најмалку 20 згради во Измир. Тој бил почувствуван и во Атина и Истанбул, како и на грчкиот остров Крит

Најмалку четири лица загинаа, а околу 150 се повредени во земјотресот што денеска го погоди градот Измир, соопшти Управата за вонредни состојби во Турција.

Земјотресот со јачина од 6,6 степени според Рихтеровата скала, кој се случи во отворени води во Егејско Море, кај местото Сеферхисар во Измир, разурна најмалку 20 згради и предизвика материјални штети.

Во тек е спасувачка акција на луѓето што се заглавени под урнатините.

„Добивме некои пријави. Се урнале згради, особено во Бајракли и Борнова. Се обидуваме да добиеме информации околу тоа. Не поседуваме информации за загуба на животи. Сега сме на пат. Добивме пријава дека се урнале 20 згради. Се обидуваме да стигнеме до Бајракли. Како што се гледа, најкритични места се Бајракли и Борнова“,

рече градоначалникот на Општина Измир, Тунч Сојер.

Управата за вонредни состојби во Турција информираше дека епицентарот на земјотресот е регистриран во 14:51 часот по локално време, во Егејското Море, 17 километри од брегот на Северихисар.

Земјотресот предизвика мало цунами во Сеферихисар, јави државната новинска агенција ТРТ, предупредувајќи ги луѓето да се држат настрана од зградите.

Турскиот претседател Реџеп Таип Ердоган упати порака со поддршка до жителите на Измир.

„Државата со сите свои ресурси е со нашите граѓани кои се погодени од земјотресот. Сите надлежни институции, министри и служби се ангажирани на терен“,

порача Ердоган.

Светските агенции јавуваат дека земјотресот се почувствувал и во Атина и Истанбул, како и на грчкиот остров Крит. Тој предизвикал и мало цунами, кое поплави делови на Самос.

©2024 360 степени, Сите права се задржани