Нашите проблеми не се завршени. Очекуваме невремето да продолжи до 18 јануари. Досега е потврдена смртта на 17 лица, но бројот на жртви може да биде поголем, соопштуваат од кабинетот на гувернерот
Во невремето во Калифорнија загинати се 17 лица, петгодишно дете се води како исчезнато, а властите наредија евакуација на многубројни области. Поројните дождови во последните два дена беа во делови кои веќе се заситени со вода и затоа предизвикаа големи поплави, откорнати дрвја, излевање на патишта и прекин на сообраќајот и снабдувањето со електрична енергија, а на некои места има и автомобили кои се однесени од порои.
Бројот на жртвите од невремето во последните недели, како што пренесуваат новинските агенции, се искачи на 17, а тоа е повеќе човечки животи отколку што одзедоа пожарите во последните две години, соопшти кабинетот на гувернерот на Калифорнија, Гевин Њусом. Најмалку 34 000 луѓе беа замолени да ги напуштат своите домови.
„Нашите проблеми не се завршени. Очекуваме невремето да продолжи до 18 јануари. Досега е потврдена смртта на 17 лица, но бројот на жртви може да биде поголем. Во гратчето Пасо Роблс, на половина пат меѓу Лос Анџелес и Сан Франциско, петгодишно момче во понеделникот било однесено од вода и се води како исчезнато. Поплавата го заробила автомобилот во кој бил со мајка му, која ја извлекол сосед. Властите мораа да ја прекинат потрагата во понеделникот поради невремето“,
рече гувернерот на прес-конференција.
Во Бејкерсфилд двајца возачи загинаа кога дрво падна на патот, објави „Лос Анџелес тајмс“.
Вчера, околу 110 000 домаќинства и бизниси останаа без струја, според веб-страницатта „Пауер аутиџ“. Националната метеоролошка служба (NWS) соопшти дека по кратка пауза синоќа, Калифорнија ќе ја зафати ново невреме со дожд.