„Беше сигурно во местото во кое јас живеев, но мислам дека најлошото допрва се подготвува“, вели младиот Стефан Младеновиќ од Србија кој денеска беше евакуиран од Тел Авив на аеродромот во Скопје
Искрено, не бев исплашен за враќањето. Сакав да останам таму, но штом падна првата бомба во местото каде што живеев одлучив да ја напуштам земјата, сведочи младиот Стефан Младеновиќ за „360 степени“.
Стефан е српски државјанин кој попладнево беше евакуиран од Тел Авив на аеродромот во Скопје. Вели оти во Израел престојувал изминатите девет месеци.
„Беше сигурно во местото во кое живеев, но мислам дека најлошото допрва се подготвува“,
вели младото момче.
На летот на релација Тел Авив – Скопје, според Младеновиќ, имало околу 70 српски државјани, а освен нив во авионот на „Ер Србија“ од Израел се евакуирани и Албанци и Црногорци.
Солзи, прегратки и емотивни сцени попладнево доминираа на скопскиот аеродром каде што пристигнаа евакуираните македонски граѓани од Израел.
Превозот со чартер-лет, на релација Тел Авив – Скопје, беше организиран согласно одлуката донесена од страна на Владата заради евакуација на сите државјани на Република Северна Македонија кои сакаа да го напуштат Израел и побараа да се вратат во Северна Македонија.
Како што соопштија вчера од Владата, во услови на целосно откажани летови и блокиран авиотранспорт со Израел, предизвикот за организирање на овој чартер-лет е надминат преку соработка со „Ер Србија“, а трошоците за летот ќе бидат покриени од Буџетот.