Под силно полициско обезбедување вчера во Скопје се одбележа 151-годишнината од раѓањето на македонскиот револуционер Гоце Делчев. Настанот беше квалификуван од висок ризик по најавите дека од Бугарија ќе дојдат голем број граѓани на гробот на „бугарскиот револуционер Гоце Делчев“
Министерот за внатрешни работи Оливер Спасовски, денеска преку својот фејсбук-профил им оддаде признание и честитки за професионализмот и посветеноста на сите организациски единици при МВР, за добро реализираниот оперативен план во делот на одржување на безбедноста при чествувањето на денот на раѓањето на Гоце Делчев.
„Како пред гробот на великанот Делчев кај црквата ‘Свети Спас’, така и на граничните премини, македонската полиција на висина на задачата успешно го спроведе овој настан од највисок безбедносен степен – еклатантен пример за тоа како постапува полиција од европски ранг. Благодарност и до граѓаните, медиумите и медиумските работници кои имаа разбирање и на најпрофесионален начин дадоа свој придонес за навистина достоинствено чествување на великанот Гоце Делчев. И, секако, како што и претходно нагласив: македонската полиција нема да дозволи понижување на македонскиот народ!“,
порача Спасовски.
Во својата објава министерот Спасовски не се осврнува на падот на системот на граничните премини, што вчера официјално беше наведено како причина од страна на МВР за непропуштањето бугарски државјани преку границата, чин на кој остро реагираше Бугарија.
Под силно полициско обезбедување вчера во Скопје се одбележа 151-годишнината од раѓањето на македонскиот револуционер Гоце Делчев. Настанот беше квалификуван од висок ризик по најавите дека од Бугарија ќе дојдат голем број граѓани на гробот на „бугарскиот револуционер Гоце Делчев“.
Полицајците, кои во голем број беа распоредени во и околу црквата „Свети Спас“, вчера изутрина вршеа претрес и проверки на новинарските екипи кои го покриваа настанот, а просторот цело време го надлетуваше хеликоптер.
На граничниот премин „Деве Баир“ бугарски државјани предизвикаа инцидент со македонската полиција која не ги пушташе да ја преминат границата поради пад на системот.
Тие ги навредуваа полицајците и се обидоа физички да ги нападнат, по што тројца од нив беа приведени и изнесени пред судот во Крива Паланка.
Министерството за внатрешни работи (МВР) вчера не соопшти на колку државјани на Бугарија вчера не им беше дозволен влез во земјава. „360 степени“ го упати ова прашање до МВР, но ни одговорија дека не можат да споделат дополнителни информации.
Бугарската национална телевизија во прилог од граничниот премин „Деве Баир“ пренесе дека Бојан Донев и Никола Арнаудов се двајца од повеќемина бугарски државјани на кои им беше забранет влез во Северна Македонија.