Напуштањето на полуостровот од страна на руските цивили следува по неодамнешните експлозии на воздухопловната база Саки на Крим, која руските сили ја користат за редовни напади на украинска територија откако ја започна својата инвазија на земјата на 24 февруари
Долги колони автомобили со руски цивили на украинскиот полуостров Крим се гледаат на видеата кои се проширија на социјалните мрежи, откако големи експлозии одекнаа во руската воена воздухопловна база Саки во западниот дел на полуостровот.
Британски Телеграф пишува дека цивилите го напуштаат Крим, плашејќи се за својата безбедност.
„Не сакам да го напуштам Крим. Овде е толку убаво. Се навикнав тука, како да сме дома. Сè беше толку убаво“,
рече Русинка која со своето семејство побегна од Крим.
Полуостровот Крим е под контрола на Русија од 2014 година, а е популарна туристичка дестинација за Русите, особено во лето.
Напуштањето на полуостровот од страна на руските цивили следува по неодамнешните експлозии на воздухопловната база Саки на Крим, која руските сили ја користат за редовни напади на украинска територија откако ја започна својата инвазија на земјата на 24 февруари.
Украинското Министерство за одбрана соопшти дека не може да ја утврди причината и не ја презеде одговорноста за експлозиите во воздухопловната база, која се наоѓа на 225 километри зад линијата на рускиот фронт.
Руското Министерство за одбрана соопшти дека експлозиите биле предизвикани од муниција што експлодирала во магацините, но не кажа како била активирана, на што Украина сугерира дека невнимателните руски војници можеби ги предизвикале експлозиите.