Мал дел од демонстрантите на протестот за судскиот случај „Монструм“, на заминување кон Чаир, превртуваа контејнери на булеварот „Цветан Димов“ кај ТЦ „Мавровка“. Сцените се одвиваа по завршувањето на протестот.
Најголемиот дел од агресивните демонстранти беа исклучително млади лица, но нивните постапки не испровоцираа интервенција од полицијата. Барем во овој дел од градот, немаше други инциденти или насилство.
Протестот почна околу 13 часот и 30 минути во Чаир. Чекорот следува откако во завршните зборови на последното судско рочиште за случајот, Основното јавно обвинителство (ОЈО) побара највисоки казни за нив поради петкратното убиство кај Смилковско Езеро. Демонстрантите поминаа по булеварот „Цветан Димов“ (Бит-пазар), а потоа групата продолжува до плоштадот „Скендер Бег“, од каде што преку Стоковната куќа „Мост“ се упати до зградата на Основното јавно обвинителство.
Случајот во јавноста познат како „Монструм“ се однесува на петкратното убиство кај Смилковско Езеро на 12 април 2012 година. На самото место беа убиени четири момчиња од македонска националност на возраст од 18 до 21 година од населбата Радишани: Филип Славковски, Александар Наќевски, Цветанчо Ацковски и Кире Трпковски и 45 годишниот Борче Стевковски од селото Црешево. Обдукцијата покажа дека во нив е пукано од три типа огнено оружје.
За убиствата беа обвинети шест лица: Агим Исмаиловиќ, Фејзи Азири, Африм Исмаиловиќ, Алил Демири, Хаки Азири и Сами Љута. Африм Исмаиловиќ и Алил Демири веднаш избегаа во Косово и досега не се екстрадирани. По првото судење, петмина од групата добија доживотна казна затвор, но Врховниот суд ја укина пресудата во 2017 година. Случајот го презеде СЈО и судењето почна од почеток, но и по повторената постапка, при која беа земени предвид и т.н. „бомби“, обвинителката Фатиме Фетаи остана на позицијата дека обвинетите го сториле делото, со исклучок на Сами Љума, за кој кажа дека нема докази. Таа побара доживотен затвор за Алил Демири, Африм и Агим Исмаиловиќ за делото тероризам и максимални казни за Фејзи и Хаки Азири, кои се обвинети за помагање во петкратното убиство кај Смилковско Езеро во 2012 година. Максималните казни што ги посочи таа за двајцата обвинети се 15, односно 9 години затвор.