Директорот вели дека ова не е прв ваков обид. На ова му претходел неовластен влез на група од 12-ина граѓани, како и обивање на неколку живеалишта на животни и нивно пуштање во кругот на Зоолошката градина
Вчера во утринските часови непознато лице се обидело да ја обие билетарницата во скопската Зоолошка градина и да влезе во благајната. Ова денеска го соопшти директорот Кристијан Стаменов, кој ова насилство го поврзува со рекордната посетеност на Зоолошката градина од 14 000 лица викендов.
Обидот за обивање на билетарницата се случил вчера 30 минути по полноќ. Безбедносните камери регистрирале лице како во два наврати се обидува да го обие влезот на благајната. Обидот бил неуспешен, па направена е само незначителна материјална штета, а сето ова е пријавено во полициската станица Карпош.
Стаменов вели дека ова не е прв ваков обид. На ова му претходел неовластен влез на група од 12-ина граѓани, како и обивање на неколку живеалишта на животни и нивно пуштање во кругот на Зоолошката градина.
Покрај тоа што сите овие настани се пријавени до надлежните органи за постапување, односно до Министерството за внатрешни работи, зголемена е будноста кај персоналот, дополнително и кај обезбедувањето, по што дополнително е зголемено обезбедувањето во ноќната смена.
„Сметаме дека сите овие обиди наликуваат на намерна саботажа на работата и функционирањето на самата Зоолошка градина, треба да се прашаме на кого му пречи успешноста на Зоолошката градина. Остро ги осудуваме сите овие обиди да се наштети на нашата работа, но и на безбедноста на животните, се надеваме дека службите од Министерството за внатрешни работи ќе работат интензивно на откривање на сторителите, со цел да се спречи и понатамошни вакви обиди“,
посочи Стаменов.