Нападот доаѓа како реакција на најавите на новата косовска влада дека ќе ги укине таксите од 100 проценти кон Србија и БиХ, кои ги воведе владата на Рамуш Харадинај
Новиот косовски вицепремиер Авдулах Хоти е нападнат со јајца денеска во близина на објектот на Владата на Косово, јави дописникот на МИА од Приштина.
На видеото кое е објавено на социјалните мрежи и во некои медиуми, се гледа како кон Хоти, кој е придружуван од уште три лица, некој фрла две јајца и извикува „таксата не смее да се укине“.
Нападот е реакција на намерата на новата косовска Влада, која ја води Албин Курти, а чиј прв потпретседател е Хоти, да ја укине таксата од 100 отсто на увозот од Србија и Босна и Херцеговина, која во ноември 2018 година ја воведе претходната влада на Рамуш Харадинај.
Партијата на Хоти, Демократскиот сојуз на Косово (ЛДК) го осуди денешниот напад, нарекувајќи го „низок чин, кој е неприфатлив и штетен за решавачките политички процеси низ кои поминува земјата“.
Инаку, Владата на Курти најави дека во блиска иднина, со цел да се обноват преговорите за решавање на спорните прашања меѓу Приштина и Белград, ќе ја укине таксата и наместо неа ќе воведе политички, економски и трговски реципроцитет кон Србија.
Против укинувањето на таксата се партиите од претходната владејачка коалиција, сегашната опозиција, а најгласни се Харадинај и неговата партија Алијанса за иднината на Косово (ААК).