fbpx
Свет

(ВИДЕО) Нов пожар се шири во Калифорнија, наредена е евакуација: „Не е под контрола“

360степени | 23 јануари, 2025 08:33

Од 31 000 жители на градот, 23 000 добиле наредба за евакуација, според шерифот на округот Лос Анџелес, Роберт Луна

Опасноста од пожари и понатаму е на критично ниво во Јужна Калифорнија, каде што илјадници жители добија наредба да се евакуираат поради пожарот што останува надвор од контрола во близина на Кастаик во северниот дел на округот Лос Анџелес.

Шумски пожар Хјуз во Санта Кларита, Калифорнија, Фото: EPA-EFE/TED SOQUI

„Пожарот што ги зафати окрузите Лос Анџелес и Вентура изгоре повеќе од 9 000 хектари и е нула отсто локализиран“,

изјави началникот на противпожарната служба на округот Лос Анџелес, Ентони Мароне.

Нема информации дека биле оштетени објекти, додаде Мароне на прес-конференција.

Кастаик се наоѓа на околу 25 километри северозападно од градот Санта Кларита и се граничи со Националната шума Анџелес. Од 31 000 жители на градот, 23 000 добиле наредба за евакуација, според шерифот на округот Лос Анџелес, Роберт Луна.

„Имаме повеќе од 4 000 пожарникари назначени за овој инцидент. Ситуацијата останува динамична, а пожарот и понатаму е тешко да се контролира, иако ние имаме предност“,

рече Мароне.

Националната метеоролошка служба го продолжи предупредувањето до утре наутро за повеќето окрузи на Лос Анџелес и Вентура, а умерениот ветер продолжува да дува низ областа, додаде тој.

Гори сува трева

Пожарот Хјуз избувнал вчера во близина на езерото Кастаик, северно од местото каде противпожарните екипи работат на целосно гаснење на пожарите Палисадес и Итон кои избувнаа на 7 јануари и изгореа повеќе од 40 000 хектари, а одзедоа и 28 животи.

„Условите во кои се наоѓаме не се толку тешки како оние со кои се соочувавме минатата недела или две, но она што го видовте (вчера) е показател за условите во кои се наоѓаме, во однос на вегетацијата“,

рече Роберт Гарсија, началникот на пожарникарската национална шума Анџелес.

Областа каде што гори пожарот е позната по своите суви, тревни ридови, додаваат пожарникарите, што ги прави условите за пожар таму критични, рече Гарсија.

Новиот пожар избувна северно од двата големи пожари кои сè уште се активни, а уништија повеќе населби претходно овој месец.

Два други пожари избувнаа на југ, во близина на Сан Диего и Оушнсајд, соопштија официјални лица. И двата се со помал обем, но ги зафатиле населените области. Пожарникарите успеале да ги стават под контрола двата пожари, наредбите за евакуација главно биле укинати, а спречено е понатамошно ширење на пожарите.

©2025 360 степени, Сите права се задржани