Јован денеска во гимназијата „Ванчо Прке“ во Виница беше пречекан со аплауз, а видео од пречекот беше споделено на Фејсбук
Јован Костадинов, храбриот млад човек кој спаси 21 живот во трагедијата со пожарот во Кочани, конечно се врати дома, објави денеска на Фејсбук министерот за здравство Арбен Таравари.
„Постојат моменти кога зборовите не се доволни, а ова е еден од нив. Како да се опише душа толку храбра и несебична, која во мигови на паника и опасност не помисли на себе, туку само на другите? Јован, кој има само 21 година, постапил како вистински херој. Влегувал повторно и повторно, не еднаш, не двапати, туку повеќе од 20 пати, за да им помогне на оние што биле заробени во пламените. Го ризикуваше сопствениот живот за да спаси други. Неговото тело ги носи лузните од неговото јунаштво, но неговото срце носи нешто далеку поголемо: почитта, восхитот и љубовта на цела нација“,
напиша Тараври.
Како што истакна Таравари, Јован не е само херој на Кочани, тој е херој на целата наша држава.
„Симбол на тоа што значи да се стави човечноста над стравот. Потсетник за сите нас колку многу може да направи еден човек со големо срце. Добре дојде дома, Јован. Твојата приказна ќе живее вечно, во животите што ги спаси, во семејствата што повторно се заедно и во срцата на секој граѓанин што сега го знае твоето име. Во име на сите граѓани, јас ќе кажам едно нешто, јасно и гласно: Никогаш нема да заборавиме“,
додаде Таравари во објавата.
Јован денеска во гимназијата „Ванчо Прке“ во Виница беше пречекан со аплауз, а видео од пречекот беше споделено на Фејсбук.