Четврток ќе биде најинтересниот ден во последните 10 години во Европа, вели претседателот на Србија најавувајќи дека е во постојани консултации со Рама и со Ковачевски за тоа дали ќе се патува за Брисел. Шефот на македонската дипломатија Османи изјави дека одлуката дали премиерот ќе присуствува на Самитот ќе ја донесе Владата на својата утрешна седница
Српскиот претседател Александар Вучиќ навестува дека е можно лидерите на земјите од Западниот Балкан да не учествуваат на Самитот ЕУ-Западен Балкан кој ќе се одржи во Брисел на 23 јуни. Тој обелоденува дека заедно со колегите од регионот градат став за тоа дали воопшто ќе се патува во Брисел.
„Добив официјална покана да присуствувам на состанокот во четврток. Ќе почекам да направиме консултации во рамки на Отворен Балкан, со господин Рама и со господин Ковачевски. Ќе ја консултирам и Владата. Потоа ќе донесеме одлука, дали ќе одиме во Брисел и која ќе биде нашата позиција. Можам да Ви кажам сега што мислам јас, но тоа нема да го сторам пред да се посоветувам со членовите на Владата, а сакам да го чујам и мислењето и на лидерите од Западниот Балкан, да ја видам и чујам нивната позиција“,
изјави денеска претседателот на Србија, Александар Вучиќ.
Тој потенцира дека четврток е исклучително важен ден, бидејќи врз основа на тоа што евентуално ќе се случува на Самитот, ќе може да се види каква ќе биде архитектурата во Европа.
„Тоа ќе биде можеби најинтересниот ден во последните десет години во Европа, на европско ниво. Не за нас интерно, ама на европско ниво, секако. Можеби најинтересниот ден. Потоа ќе видиме каква ќе биде архитектурата на Европа, ќе можеме да разбереме што не очекува и ќе можеме да го видиме своето место или подобро да го разбереме своето место. Не потценувајќи се себеси, но и не преценувајќи ги ниту нив, ниту нас“,
рече Вучиќ.
Шефот на македонската дипломатија Бујар Османи во интервју за ТВ Телма, прашан дали премиерот Ковачевски ќе оди на Самитот во Брисел рече дека за тоа одлука утре ќе донесе Владата.
„Утре имаме седница. Таа ќе даде му мандат на нашиот премиер за да присуствува или не присуствува. Така што таа одлука, се разбира, ќе биде донесена утре. Не сакам да прејудицирам, чисто кажувам која е формата на таквите посети“,
изјави министерот за надворешни работи Бујар Османи.