Главниот криминалец Радоичиќ беше водач на оваа терористичка група и на нападот во кој беше убиен полицаецот Африм Буњаку. Ова е уште еден доказ за неговата терористичка активност против Република Косово. Потпретседателот на Српската листа е лидер на терористичкиот напад и терористичката група, пишува Свечља на Фејсбук
Министерот за внатрешни работи на Косово, Џелал Свечља, на својот фејсбук-профил објави видео во кое тврди дека се гледа како меѓу униформираните вооружени лица кои се судриле со косовската полиција во манастирот Бањска во општина Звечан, на северот на Косово, е и потпретседателот на Српска листа, Милан Радоичиќ.
„Главниот криминалец Радоичиќ беше водач на оваа терористичка група и нападот во кој беше убиен полицаецот Африм Буњаку. Ова е уште еден доказ за неговата терористичка активност против Република Косово. Потпретседателот на Српската листа е лидер на терористичкиот напад и терористичката група“,
напиша Свечља во објавата.
Во објавата, тој го обвини претседателот на Србија, Александар Вучиќ, дека преку Српската листа, а овие преку својот потпретседател Радоичиќ, имаат преземено терористички акции против правниот и уставниот поредок на Косово.
Свечља и во интервју за „Еуроњуз Албанија“ повтори дека видеото на кое, како што рече, се гледа Радоичиќ, е снимено со полициски дрон, а Радоичиќ бил во просториите на манастирот Бањска, пренесува регионалниот сервис на Радио Слободна Европа (РСЕ).
Тој, како што пренесува РСЕ, рекол и дека во неделата во акција биле над 30 терористи предводени од Милан Радоичиќ и оти бројот на загинатите напаѓачи можеби е поголем од тројца, но дека сè уште се бараат „докази“ за точниот број.
Косовската полиција во Јужна Митровица ги покажа оружјето, возилата и предметите запленети во селото Бањска на северот на Косово по завчерашниот напад на вооружената група, во кој загина полициски старешина, а три лица од групата беа убиени и неколкумина беа уапсени.
На прес-конференцијата на која беа презентирани арсеналот оружје, униформи и логистичка опрема запленети од косовската полиција, Свечља рече дека во едно од возилата, марка „мерцедес“ со белградски регистарски таблички таблички, биле пронајдени документи на име на заменикот на Српска листа, најголемата партија на Србите на Косово, Милан Радоичиќ.
Косовската полиција, како што пренесе српската телевизија Н1, повикувајќи се на „Коссев“, уапсила уште две лица, хотелски работници во Бањска, каде што, според информациите, е пронајдено и оружје.
Според последните официјални информации, во инцидентите кои траеле повеќе од 15 часа загинале вкупно пет лица. Од нив – еден припадник на косовската полиција и четворица напаѓачи. Воедно, последните информации се дека во врска со судирите во Бањска се уапсени шест лица, од кои двајца се ранети.