На молитвата присуствува и турскиот претседател Реџеп Таип Ердоган, кој со декрет ја прогласи некогашната христијанска црква од музеј во џамија
Илјадници верници во Турција дојдоа на првата молитва во Аја Софија откако од музеј стана џамија.
Дел од нив се внатре во објектот, а стотици други се пред џамијата и настанот го следат преку видеобим.
Настанот го обезбедуваат повеќе од 17 000 полицајци.
Во првите редови на џума намазот, кој се одржува прв пат по 86 години, е и турскиот претседател Реџеп Таип Ердоган, кој со декрет ја прогласи поранешната византиска црква во џамија.
Претходно државниот совет, највисокиот управен суд на Турција, на почетокот на јули донесе пресуда со која на барање на група верници беше поништена одлуката на Советот на министри од 1934 година со која Аја Софија стана музеј.
Основата за оваа пресуда бил сомнежот во автентичноста на потписот врз одлуката на основачот на современа Турција, Мустафа Кемал Ататурк.
Потегот предизвика критика од САД, ЕУ, Грција, Руската православна црква, УНЕСКО и повеќе христијански лидери.