САД и ЕУ се крајно разочарани од одлуката на турската влада за пренамена на Света Софија од музеј во џамија.
„Укажуваме на преземената обврска на турската Влада дека ќе гарантира пристап до Аја Софија за сите посетители и со нетрпение очекуваме да ги видиме нејзините планови за управување со објектот“,
истакна портпаролката на американскиот Стејт департмент Морган Ортагус.
Жалење констатираше и високиот претставник на Европската унија за надворешни работи и безбедносна политика Жозеп Борел.
„Одлуката на турскиот Државен совет да поништи една од модерните одлуки на Турција и одлуката на претседателот (Реџеп Тајип) Ердоган, споменикот да се даде под управа на Дирекцијата за верски прашања е за жалење“,
истакна Борел.
Тој потсети дека Турција е една од основачите на Сојузот на цивилизации, кој е посветен на промоција на меѓуверски и меѓукултурен дијалог и негување на толеранцијата и соживотот.
Претседателот на Турција, Реџеп Таип Ердоган вчера потпиша декрет со кој Света Софија повторно ќе биде џамија.
Тој го потпиша указот откако турскиот Високиот административен суд ја поништи одлуката на Советот на министри од 24 ноември 1934 година за пренамена на Света Софија од џамија во музеј.
Ердоган најави дека на 24 јули во Света Софија ќе се одржи петочна молитва. Тој истакна дека барањата Света Софија да остане музеј е исто како „да се бара Ватикан да се претвори во музеј и да се затвори за богослужба“.
Света Софија беше најголемата христијанска црква, изградена во шести век од Византијците, а во џамија беше претворена по османлиското освојување на Цариград, денешен Истанбул, во 1453 година.
Статусот од верски објект во музеј беше променет со указ во 1934 година од тогашниот турски претседател Мустафа Кемал Ататурк. Света Софија во 1985 година е прогласена за споменик на Светското културно наследство на УНЕСКО.