Турскиот државен совет (висок административен суд) ја поништи одлуката на Советот на министри од 24 ноември 1934 година за пренамена на „Света Софија“ од џамија во музеј, јави турската новинска агенција Анадолија, со што се отвора патот да се пренамени во џамија.
Според неофицијални извори, првата молитва во џамијата најверојатно ќе се одржи на 15 јули, денот кога во 2016 година беше обидот за државен удар.
„Света Софија“ е најголемата христијанска црква, изградена во шестиот век од Византијците, а во џамија е претворена по османлиското освојување на Цариград, денешен Истанбул, во 1453 година. Статусот од верски објект во музеј беше променет со указ во 1934 година од тогашниот турски претседател Мустафа Кемал Ататурк.
Пред минатогодишните избори претседателот Реџеп Таип Ердоган ја најави можноста „Света Софија“ да се пренамени во џамија. Религиозните власти веќе долго време бараа ова светско културно наследство на УНЕСКО повторно да се претвори во џамија, додека противниците оценуваат дека актуелниот музејски статус е симбол на секуларниот Устав на Турција.
Шефот на турската дипломатија Мевлут Чавушоглу претходно изјави дека статусот на „Света Софија“ е прашање на национален суверенитет.
Турските планови за пренамена на „Света Софија“ не наидоа на одобрување од САД, Русија, Грција и црковните власти.
Вселенскиот патријарх Вартоломеј чие седиште е во Истанбул изјави дека пренамената во џамија ќе ги разочара христијаните и ќе предизвика раздор помеѓу Истокот и Западот.