Речиси нема населба која не претрпе штети од невремето попладнево
Невремето проследено со пороен дожд, град, грмотевици и ветер што попладнево го зафати Скопје, предизвика поплави на голем дел од улиците, подвозници, куќи и дворови. Има и искршени гранки и дрва, но и урнати монтажни објекти.
Се уште нема официјални информации за штетите од невремето со пороен дожд и град, но од она што нашата редакција го виде на терен, поплави и штети има во речиси секоја скопска населба.
На улицата кај МТВ има речиси еден метар вода, поради што движењето е отежнато.
Иста слика е и од населбата „Јане Сандански“.
Невремето создаде проблеми во проодноста и кај Олимпискиот базен.
Оние кои се затекнаа надвор на невремето се снаоѓаа како знаат за да се движат низ пловните улици.
Една од проблематичните точки кога има пообилен дожд е подвозникот кај Стоковната куќа „Мост“ каде и овој пат немаше исклучок. Таму беше заглавено возило на брзата помош.
Засега регистриравме и неколку штети како искршени дрвја, откорнати табли, урнати монтажни објекти.
Таква е ситуацијата во Центар, кај ЗОИЛ.
Цел монтажен објект на „Градски паркинг“ е урнат зад Градската болница во Центар.
Искршени дрвја има и во Карпош и на „Партизанска“ блиску до Соборниот храм.
Искршени дрвја има и во Градскиот парк.
Сообраќајот на улицата „Огњан Прица“ во Кисела Вода е во прекин поради паднато дрво.
Во Центар, кај трговскиот центар Буњаковец откорната е таблата со натпис на аптеката „Зегин“.
На социјалните мрежи вечерва се споделуваат видеа и фотографии од поплавата во најголемиот трговски центар во земјава „Ист Гејт“.