На некои места каде е опасно да се делува ноќе и има потреба да се исклучи струјата, ќе се интервенира во текот на утрешниот ден
Екипите на ЈП „Паркови и зеленило“се на терен за расчистување на паднати гранки и дрвја и овозможување на нормално функционирање на градот, по невремето што го зафати Скопје попладнево.
„Досега се пријавени над 40 локации на кои е побарана наша интервенција, но од час во час стигнуваат и нови пријави. Се случува на една локација да има паднати повеќе дрвја и гранки, така што бројот на потребни интервенции е многу поголем“,
велат од јавното претпријатие.
Екипите моментално работат на неколку места, а веќе завршија со интервенции на повеќе локации. За поголема ефикасност има четири екипи, од кои секоја екипа работи во одредени делови од градот. Освен секторот Дрвореди во активностите на расчистување на градот се приклучени и работниците од секторите Вонградско зеленило и Градско зеленило.
„На некои места каде е опасно да се делува ноќе и има потреба да се исклучи струјата, ќе се интервенира во текот на утрешниот ден, додека пак онаму каде што постојат услови за работа ќе продолжиме со расчистувањето и во текот на вечерните и ноќните часови, а со активностите ќе продолжат и во наредните денови се до целосно расчистување на последиците од невремето“,
соопштија вечерва од „Паркови и зеленило“.
Од ЦУК соопштија дека досега се пријавени стотина штети, меѓу кои и паднати дрвја.
Напата редакција веднаш по невремето сведочеше на повеќе паднати дрвја во Центар и Карпош, како и во Градскиот парк.