Во моментов на терен се над 50 пожарникари и над 10 цистерни, а во логистиката се вклучени и приватни лица
Припадниците на Службата за заштита и спасување на Херцег Нови успеале да го стават под контрола пожарот во Њивице, објави Вијести.ме.
Како што изјави за локалната телевизија РТХН командантот Златко Ќировиќ, голем проблем е ветерот што не стивнува.
„Пожарот е сè уште активен, еден дел е под контрола, но, не и на запад кон Жвиње, па авијацијата на Дирекцијата се концентираше да го пресече тој дел. Наскоро го очекувам хеликоптерот на Армијата на Црна Гора“,
додаде тој.
Противпожарните служби сметаат дека ситуацијата би била многу подобра доколку ветрот престане, бидејќи со помош на пожарникарите од терен, авијацијата за релативно краток временски период би можела да го санира пожарот.
Ќировиќ изјави и дека денеска во Њивице се пожарникари од цела Бока.
Службата за заштита и спасување на Тиват излезе со специјални камиони за гаснење шумски пожари и мало возило за итни случаи за да им помогне на колегите во Херцег Нови.
Доброволните противпожарни бригади „Кртоли“ и „Бока“ испратија по две противпожарни возила да помогнат во Херцег Нови, а ДВД „Тиват“ испрати една противпожарна цистерна.
Во моментов на терен се над 50 пожарникари и над 10 цистерни, а во логистиката се вклучени и приватни лица.
Пожарот од големи размери избувна на Њивички пат во општина Херцег Нови, пред граничниот премин, утринава околу девет часот.
Ситуацијата беше и критична, бидејќи пожарот го преминал патот и се проширил кон населбата. Притоа изгорела една напуштена зграда, а пожарот беше закана за повеќе од 15 куќи. Две куќи биле во непосредна опасност од пожар, но тие биле спасени благодарение на реакцијата на пожарникарите.
Во гаснењето на пожарот учествувал и авион на МВР.
РТХН рано утринава соопшти дека била повикана Дирекцијата за вонредни состојби, но дека, според информациите што им ги соопшти Ќировиќ, хеликоптерите биле приземјени поради технички проблеми, а авионот бил ангажиран во гаснењето на пожарот во Нудол.