Превозот од Тел Авив до Скопје го организира македонската влада, за евакуација на сите државјани на Република Северна Македонија кои сакаа да го напуштат Израел и побараа да се вратат во Северна Македонија
Покрај македонските, на летот имаше и седум државјани на Црна Гора, како и државјани на Србија
Амбасадорката на Црна Гора во земјава, Марија Петровиќ, денеска дојде на аеродромот во Скопје за да ги пречека црногорските државјани за кои се најде место на евакуацискиот лет од Тел Авив до Скопје. Чартер-летот го организира и плати македонската влада, а се реализира преку авиокомпанијата „Ер Србија“.
„Навистина би сакала да се заблагодарам на Владата на Република Северна Македонија, на Министерството за надворешни работи, на исклучителната соработка. Знаете, во овие тешки моменти, нашето пријателство станува сè подлабоко и покажуваме заедно и хуманост и грижа за нашите државјани“,
изјави Марија Петровиќ, амбасадорка на Црна Гора во РСМ.
Како што веќе извести „360 степени“ од Аеродромот Скопје, летот од Тел Авив пристигна околу 15 часот. Патувањето, за тие што побарале евакуација, е бесплатно. Поради војната во Израел се откажани голем дел од комерцијалните летови, па авиотранспортот е практично блокиран. Заминување, по воздушен пат, е извесно само преку евакуациски летови.
Некои од патниците и нивните роднини кои ги чекаа во Скопје, не можеа да ги скријат солзите.
Ова не е прва група македонски граѓани кои се враќаат со евакуациски лет. Претходно, токму со лет кој го организира Црна Гора, во земјава се вратија неколку наши државјани. Пред четири дена, во Тирана, со лет на „Ер Албанија“ се вратија деветмина велешани кои во Израел престојувале како туристи.