Премиерот Зоран Заев денеска повторно зборуваше за вакцините од Кина и изјави дека до крајот на идната недела, односно до крајот на февруари, во земјава треба да стигнат кинеските вакцини, откако претходната недела ги споменуваше и датумите 15 или 16 февруари.
„Кинеската вакцина е во постапка на договарање. Ветувањето е дека до крајот на февруари ќе стигнат вакцините, секој ден порано за нас е важен. Додека се имплементираат овие 4 680 вакцини кои српскиот народ вчера ни ги подари, а ќе се дореализираат и останатите до 8 000, верувам дека ќе стигнат и кинеските, за целиот процес да тече континуирано. Очекувањата се од крајот на оваа, сѐ до крајот на идната седмица, тогаш отприлика завршува и февруари“,
изјави денеска Заев.
Мината недела тој, одговарајќи на новинарски прашања, првично рече дека се очекува кинеските вакцини да пристигнат околу 15-16 февруари.
„Денеска очекуваме да се случи плаќањето од страна на нашата земја за да може да се испланира пакувањето, обезбедувањето на превозот. Денови се пред нас кога ќе стигнат вакцините“,
изјави премиерот на 10 февруари.