Ова Обвинителство, исто како и СЈО, било коцка од мозаикот за присилување пратеници за гласање на уставните измени. Сметам дека ова обвинение е направено за политички цели од политичка партија која е на власт, рече Трајко Вељаноски во своите воведни зборови во судскиот процес за организацијата на „27 април“, алудирајќи на Обвинителството за гонење организиран криминал и корупција чија шефица е Вилма Русковска.
Вељаноски во периодот на „крвавиот четврток“ беше претседавач на Собранието, а на стартот на воведните зборови уште еднаш го впери прстот кон обвинителството велејќи дека воведните зборови на Русковска биле политички говор.
*Поврзана вест
Ќе докажам, рече Вељаноски, дека конститутивната седница ја закажав согласно Уставот и Деловникот на Собранието.
„Ќе го докажам фактот дека на 27 април 2017 година, некаде околу 13 часот, пратеникот Зоран Заев зеде збор и го кажа следното: ‘Ќе се носи одлука во оваа сала, во некоја друга сала, во ходникот, на скалите, во амфитеатарот на Правен’. Ќе докажам дека ова ми укажуваше дека може да дојде до тензична ситуација… Но, со оглед на тоа дека имаше многу пратеници пријавени за збор, не ни очекував дека ќе дојде до избор претседател на Собранието“,
рече Вељаноски.
Тоа што го кажал Заев во салата, рече тој, го кажал и на прес-конференција, а службите преку порака го известиле Вељаноски за тоа.
„Таа порака само ја препратив до Никола Груевски, кој беше претседател на ВМРО-ДПМНЕ“, рече Вељаноски.
Вељаноски во својот воведен збор зборуваше и за пратеникот Зекирија Ибрахими, кој критичниот ден ја пееше албанската химна од говорницата во Собранието.
„За време на пеењето немаше превод од собранискиот преведувач и јас не бев запознаен што се пее на албански“, рече Вељаноски.
Тој тврди дека не ги прекршил правилата со тоа што му дал збор на Ибрахими, кој бил пријавен за процедурално обраќање како заменик-координатор. Вељаноски забележа и зошто овој пратеник не бил барем сослушан во истрагата ако обвинителството тврди дека неговото пеење било иницијална каписла.
На крајот од неговите воведни зборови, тој ѝ возврати на обвинителката Вилма Русковска која во своите воведни го цитираше Гоце Делчев.
„Ако некој ја цитира мислата на великанот Гоце Делчев, треба да ја цитира во целост, па затоа јас ќе го цитирам почетокот кој беше изоставен: ‘Не познавам друг народ кој повеќе страдал од предавствата на своите синови изроди’. А, јас ќе додадам и дека македонскиот народот најмногу страдал од слугите на сите режими“,
рече Вељаноски.
Инаку, обвинителката Вилма Русковска денеска не е присутна во судница, па не можеше да го слушне обраќањето на екссобранискиот спикер. На нејзино место денеска во судница е обвинителката Ивана Трајчева.
*Поврзани вести
Оливер Спасовски денеска сепак нема да сведочи за „27 април“
Миле Јанакиески го цитираше Барак Обама и најави дека ќе го повика Ѓорге Иванов за сведок
Спиро Ристовски: Јас не ја прaтив пораката „Сите членови доаѓајте пред Собрание, сега е моментот“