Сношти македонски медиуми триумфално известуваа за „првата отстапка од Софија за Скопје”, за тоа дека новата власт во Бугарија го симнала од програмата најавениот документарен филм во кој се прикажани интервјуа и документи за масовното истребување на Бугарите од страна на југословенските власти во Македонија, пишува во најавата за протестот
Правнукот на Кузман Шапкарев, Љубомир Талев, близок соработник на ексшефицата на бугарската дипломатија Екатерина Захариева, вели дека слично сценарио во Бугарија се случило и пред седум децении кога во Софија доаѓал Јосип Броз Тито
Информацијата на „360степени“ дека Бугарската национална телевизија (БНТ) вчеравечер неочекувано од својата програма го повлече најавениот документарен филм „Само затоа што беа Бугари“ предизвика многу коментари и критики насочени кон директорот на БНТ, Емил Кошлуков, и кон бугарската влада.
Контекстот е врамен на начин што однесувањето на БНТ и на владата се третира како „предавничко“, а на фејсбук-групата „Борба против македонизмот“ за вечерва е закажан протест пред БНТ и се апелира за помасовно присуство.
„Сношти македонски медиуми триумфално известуваа за „првата отстапка од Софија за Скопје”, за тоа дека новата власт во Бугарија го симнала од програмата најавениот документарен филм во кој се прикажани интервјуа и документи за масовното истребување на Бугарите од страна на југословенските власти во Македонија. Очигледно под притисок на новата власт. Ова е уште еден јасен сигнал дека владејачката партија се подготвува да изврши едно од најголемите национални предавства во нашата нова историја – историски компромис со нашите национални интереси во Македонија. По тој повод ги повикуваме сите граѓани патриоти на протест вечерва во 18 часот пред БНТ. Ги повикуваме сите што имаат можност да дојдат за да им покажеме на властите дека ако си дозволат да ги предадат нашите национални интереси ќе бидат збришани од народното незадоволство. За време на протестот пред зградата на БНТ ќе го емитуваме филмот ‘Само затоа што беа Бугари’, кој беше отстранет од програмата на БНТ“,
пишува во најавата за протестот.
Реагираа и голем број јавни личности. Пратеникот на ГЕРБ, Тома Биков, смета дека ако историските факти што ги акцентира филмот се проблем за актуелната власт во Република Северна Македонија, тоа значи дека земјата е далеку од тоа дека воопшто е подготвена за преговори за членството во ЕУ.
„Ако некој мисли дека односите меѓу Бугарија и Република Северна Македонија може да се набљудуваат само низ призмата на трговијата и на податоците за размена на стоките меѓу двете земји како единствен израз, тоа значи дека нему не му е јасен ниту контекстот на тие односи ниту, пак, нивната генеза, тој не е е свесен ниту за проблемот ниту за неговото решавање. Ако бугарскиот премиер е личност која дели вакво површно гледиште, тоа значи дека наскоро ќе капитулираме на најпонижувачки начин за нас. Спорот меѓу Бугарија и Република Северна Македонија не е комерцијален туку политички. Политичките спорови не можат да се решат со помош на трговија ниту со заеднички разговор. Тие не можат да се решат ниту со игнорирање на минатото, затоа што минатото е веќе факт. Обидот да се вметнат бугарско-македонските односи само во контекст на сегашноста може да ги лиши од минатото, но и ќе ги лиши од иднината“,
пишува Биков на својот фејсбук-профил.
За историчарот Петар Стојанович отстранувањето на филмот од програмската шема на БНТ во име на дипломатијата е срамен и понижувачки чин, акт на нихилизам и национално предавство, невидено и нечуено во поновата бугарска историја.
Сличен е и ставот на колумнистката на весникот „Труд“, Викторија Георгиева. Таа оди чекор понатаму и освен за „отстапката“ со филмот, го карактеризира како срамно и однесувањето на бугарскиот премиер Кирил Петков, кој во Скопје зборувал за „фашистички режим“ и не го посетил гробот на Гоце Делчев, а во Софија не го однел „драгиот гостин Ковачевски“ на споменикот на Цар Самуил. „Вие сте срам!, пишува во својата објава на Фејсбук новинарката Гeoргиева.
Правнукот на Кузман Шапкарев, Љубомир Талев, близок соработник на ексшефицата на бугарската дипломатија Екатерина Захариева, вели дека слично сценарио во Бугарија се случило и пред седум децении кога во Софија доаѓал Јосип Броз Тито.
„Во 1947 година, пред неговата посета на Бугарија, големиот бугарски писател и близок до десното крило во ВМРО, Димитар Талев, бил притворен и внесен во комунистичкиот концентрационен камп ‘Куцијан’, само за да не му го скршат атерот на ‘високиот гостин’, потсетувајќи го дека Македонците се Бугари. Се повтори историјата. И тогаш и сега со нас владеат комунисти, кои само ги извршуваат задачите што им ги довериле странските господари кои ги донесоа на власт. Една од тие задачи е да ја убијат бугарштината во Македонија. Актуелниве сè уште не почнале да затвораат во логори за изнесување на вистината околу овие прашања или да стрелаат, но изгледа и тој ден не е далеку“,
вели Талев.
Од Националниот младински комитет на ВМРО-БНД не само што најавија дека ќе земат учество туку побараа и оставка од министерот за култура Атанас Атанасов поради цензура и предавство на националните интереси.
Бугарските медиуми пренесуваат дека не се знаат причините поради кои филмот бил повлечен од програмата, особено имајќи предвид дека авторката Милена Милотинова во текот на целиот ден на социјалните мрежи го рекламирала емитувањето во посочениот термин, а само еден ден претходно, во неделната емисија „Денот започнува“, генералниот директор на БНТ, Емил Кошлуков, јавно го најави неговото емитување.
„Овој понеделник го емитуваме филмот ‘Само затоа што беа Бугари’ – кој зборува за обидите за бришење на нивната бугарската самосвест, за да ги македонизираат. Ние сме ги признале таа држава и тој народ. Ние од нив не можеме да направиме Бугари, но не можеме да се откажеме од историјата. Ќе имаме наредниот понеделник и емисија по повод 150-годишнината од раѓањето на Гоце Делчев. Ќе имаме и уште за темата Македонија“,
вели Кошлуков во емисијата.