Прашан да го коментира извештајот на „Политико“, според кој Македонија е исклучена од патоказите што ги подготвува ЕУ за дел од земјите кандидати, Муцунски рече дека се очекува ЕК неделава да објави документ поврзан со политиката на проширување во кој, според неговите информации, треба да биде дефиниран и патот кон нови политики на т.н. постепена интеграција, што, како што кажа, е особено значајно за земјава
Министерот за надворешни работи и надворешна трговија Тимчо Муцунски смета дека со досегашните разговори со официјална Софија, во кои не била вклучена трета страна, не е постигнат никаков напредок и дека очигледно во разговорите треба да помогне, како што вели, најзасегнатата страна, а тоа е Европската Унија.
Муцунски ова го изјави го гостувањето на дневникот на телевизија Сител, прашан да го образложи предлогот што пред неколку дена го изнесе во интервју за МИА – вклученост на ЕУ во натамошните разговори со Бугарија.
„Пред неколку месеци јас имав билатерална средба со мојата колешка. Претседателката Силјановска-Давкова се сретна со претседателката Јотова. И на тие средби секоја страна си ги кажува своите позиции, а никаков напредок не постигнуваме. А целта и најголемиот успех би било да се најде начин да обезбедиме предвидлив пат на државата, што значи дека очигледно е потребна помош од најзасегнатата страна, а тоа е Европската Унија во една целина. Затоа сме убедени дека е потребно засилено директно вклучување“,
изјави Муцунски во гостувањето на ТВ Сител.
Ваквиот предлог, како што рече Муцунски, досега е искомунициран официјално до Брисел и до Софија.
„Во таа смисла позитивно гледаме и на посетата на претседателката на Европската комисија, Урсула фон дер Лајен, која на крајот на оваа недела ќе биде во посета на земјава, при што, меѓу другото, ќе можеме и за оваа тема многу поконкретно да разговараме“,
вели министерот за надворешни работи, додавајќи дека посетата на шефицата на ЕК, меѓу другото, испраќа порака дека ЕУ останува заинтересирана за регионот.
Неспорно е, вели тој, дека е потребно решение со Софија, но такво што ќе обезбеди предвидливост и сигурност.
„Европската Унија и 26 земји членки ни велат: ‘Единствен предуслов се уставните измени.’ Една земја членка ни вели: ‘Има многу повеќе.’ И тука е недостатокот на предвидливост. Затоа велиме – под вакви услови, кога е очигледно дека една земја членка сака да внесе прашања поврзани со историски наративи, прашања поврзани со јазик, прашања поврзани со нешто што е суверена внатрешнополитичка надлежност на една Влада, кога сака такви прашања да внесе во процесот, ние немаме логика да пристапиме кон реализирање на било што“,
вели Муцунски.
Прашан да го коментира извештајот на „Политико“, според кој Македонија е исклучена од патоказите што ги подготвува ЕУ за дел од земјите кандидати, Муцунски рече дека се очекува Европската комисија неделава да објави документ поврзан со политиката на проширување, во кој, според неговите информации, треба да биде дефиниран и патот кон нови политики на т.н. постепена интеграција, што, како што кажа, е особено значајно за земјава.
„Точно е и дека ќе се објават, по наши информации, патокази за неколку држави. Но она што јас би го кажал е дека ние како држава повеќе од 35 години имаме многу искуство на ветувања дека ќе бидеме нагласени како таканаречен ‘фронтранери’, најдобра земја, земја која е прва, а потоа да нема испорака. Да, значајно е да се исполнуваат условите и да се спроведуваат реформите, но секогаш пристапувањето на нова земја членка било политичка одлука. Никогаш не било техничка или одлука базирана единствено на исполнети критериуми“,
вели Муцунски.