Пратениците досега ја утврдија кандидатурата на граѓанскиот судија во Апелациониот суд во Скопје, Фатмир Скендер, а по завршувањето на расправата за Васиќ-Бозаџиева, која работи во Министерството за правда како државен советник за граѓанско законодавство, треба да ја разгледаат биографијата и на републичкиот јавен обвинител Љубомир Јовески како предлози од владејачките партии
Со седум гласа „за“, пет „против“ и ниту еден воздржан, Татјана Васиќ-Бозаџиева која работи во Министерството за правда како државен советник за граѓанско законодавство, ја доби поддршката од членовите на собраниската Комисија за прашања за изборите и именувањата да биде предлог-судија на Уставниот суд.
Седницата потоа продолжи со расправа за кандидатот Тодор Витларов, вработен во штипското обвинителство, предлог на опозицијата.
Координаторот на пратеничката група на ВМРО-ДПМНЕ, Никола Мицевски на денешната седница повторно посочи оти би било добро потенцијалните уставни судии сами да се претстават пред пратениците, со цел, како што кажа, пратениците да можат да постават прашања и потоа да направат евалуација.
Мицевски ја образложи кратката биографија за Витларов и порача дека доколку би го избрале, би имале уставен судија со кој, како што вели, особено би се гордееле.
Антонио Милошоски, исто така од ВМРО-ДПМНЕ, направи споредба на биографијата на Васиќ-Бозаџиева и Витларов, и, посочи дека според истата, Витларов е истакнат правник, а Васиќ Бозаџиева не е истакнат правник.
Пратениците досега ја утврдија кандидатурата на граѓанскиот судија во Апелациониот суд во Скопје, Фатмир Скендер, а по завршувањето на расправата за Васиќ-Бозаџиева, која работи во Министерството за правда како државен советник за граѓанско законодавство, треба да ја разгледаат биографијата и на републичкиот јавен обвинител Љубомир Јовески како предлози од владејачките партии.
Од шестмината кои се предлози од опозициската ВМРО-ДПМНЕ, досега е одбиена кандидатурата на универзитетската професорка Родна Живковска. Предлози на опозицијата се и универзитетскиот професор Саво Климовски, судијата во пензија Бранко Секуловски, судијката од Управниот суд Весна Јовановска, обвинителот Тодор Витларов и Војислав Димовски јавен обвинител од Основното јавно обвинителство во Охрид.
Уставниот суд повеќе од една година работи во нецелосен состав. Од предвидените девет члена на четворица им е истечен мандатот.