Во Уставниот суд во моментов недостасуваат двајца судии. За едно од местата, расправата во Собранието е блокирана, додека за пополнување на второто постапката сè уште не е почната. Третото место, пак, ќе се ослободи на почетокот на декември годинава
Двајцата новоизбрани уставни судии Татјана Васиќ-Бозаџиева и Фатмир Скендер од денеска почнаа со работа на новите функции, а претседателката на Уставен, Добрила Кацарска, им ги даде материјалите за следната седница закажана за 9 ноември.
„Судиите Бозаџиева и Скендер се запознаа со вработените во службата на Уставниот суд и во наредниот период ќе им бидат распределени предмети за работа. Двајцата новоизбрани уставни судии имаат мандат од девет години. Уставниот суд и во оваа пригода апелира до пратениците да го почитуваат Уставот и да ги пополнат и останатите три судиски места за да може судот да функционира во полн капацитет и да одлучува за сите предмети кои се од голема важност за државата и за граѓаните“,
велат од Уставен.
Васиќ-Бозаџиева и Фатмир Скендер во Собранието беа изгласани за нови уставни судии во петокот. Тие се избраа во постапка во која се бараше пополнување на три места, меѓутоа со оглед дека расправата во собраниската Комисија за прашања за изборите и именувањата е блокирана од опозицијата, пратениците од власта избраа само двајца, додека за третото име дискусијата ќе продолжи. Расправата е застаната кај тоа дали републичкиот обвинител Љубомир Јовески треба да биде изгласан како што предлага владејачкото мнозинство.
Овие три места во Уставен беа празни речиси година и половина откако на тројца уставни судии мандатот им истече кон крајот на мај лани. Во јануари годинава заврши деветгодишниот мандат на уште судија со што од почетокот на 2022, па досега судот функционираше со само пет од предвидените девет судии. Постапката за избор на судија за ова место сè уште не е почната.
Третото место за кое од Уставен бараат да се пополни заедно со споменатите две кои остануваат празни, ќе се ослободи на почетокот на декември годинава кога ќе заврши мандатот на една од актуелните судијки.