Полскиот премиер Матеуш Моравјецки објави дека НАТО испратил покана до Полска да ги вакцинира вработените на Алијансата
Околу 3 500 вработени во седиштето на НАТО во Брисел ќе бидат вакцинирани со вакцината на „Астра Зенека“ од полските резерви за што в четврток тим од дваесетина полски здравствени работници ќе отпатуваат во Брисел.
Полскиот премиер Матеуш Моравјецки објави дека НАТО испратил покана до Полска да ги вакцинира своите вработени, пренесе бриселскиот портал „Еурактив“.
„Ова е важна мисија, бидејќи НАТО е организација која гарантира безбедност за околу милијарда луѓе во светот, и секако дека ќе го сториме тоа. Нашиот тим за итна медицинска помош ќе се погрижи клучните носители на одлуки и персоналот во седиштето на Алијансата брзо да добијат отпорност на вирусот“,
напиша полскиот премиер на Фејсбук.
Вчера генералниот секретар на НАТО, Јенс Столтенберг, се заблагодари преку Твитер.
I am grateful to #Poland & PM @MorawieckiM for readiness to support #COVID-19 vaccination at NATO HQ. Solidarity and resilience are at the heart of #NATO. Poland is a strong Ally who has provided support to many other Allies and partners in our joint fight against the pandemic. pic.twitter.com/GxIC92r66E
— Jens Stoltenberg (@jensstoltenberg) March 21, 2021
„Благодарен сум на Полска и премиерот Моравјецки за нивната подготвеност да ја поддржат вакцинацијата против ковид-19 во седиштето на НАТО. Солидарноста и флексибилноста се суштината на НАТО. Полска е силен сојузник, кој обезбеди поддршка за многу други сојузници и партнери во заедничката борба против пандемијата“,
напиша Столтенберг на Твитер.