Во однос на впечатокот дека кога односите со Бугарија се на многу ниско ниво, повторно се интензивира дијалог со САД, Османи рече дека има континуитет во однос на стратешкиот дијалог, а по дефинирање на темите со овој дијалог, се формираше работна група која заедно со американската администрација создаде конкретни проекти во краткорочни, среднорочни и долгорочни рамки
Владата на денешната седница, на предлог на Министерството за надворешни работи, го утврди Планот за активности во рамките на стратешкиот дијалог меѓу Република Северна Македонија и САД со период на реализација од 2023-2033 година.
„По успешно одржаниот стратешки дијалог со САД (02.06.2022 година), од страна на Министерството за надворешни работи, а во координација со другите релевантни институции, е пристапено кон подготовка на документи, со содржани предлог-проекти за соработка со САД (остварливи на краток и на долг рок), а на основа на дискусиите и добиената поддршка во рамки на стратешкиот дијалог. Утврдувањето конкретни проекти за соработка на основа на разговорите во рамки на стратешкиот дијалог – преточени во План на активности, според посочувањето од Министерството за надворешни работи, ќе овозможи динамизирање на соработката и што поскоро одржување на наредната сесија на стратешкиот дијалог“,
информираат од Владата.
Владата го задолжи Министерството за надворешни работи да го следи текот на реализацијата на проектите наведени во Планот и на секои шест месеци да поднесува извештај.
Како што посочи министерот за надворешни работи Бујар Османи, стратешкиот дијалог со САД не е алтернатива, туку е комплементарен на процесот на ЕУ-интеграција.
„Точно е дека стратешкиот дијалог беше инициран од наша страна тогаш кога беше неизвесно дали ќе почнат преговорите. Бидејќи сметавме дека ни треба еден таков процес во којшто ќе се следат сите аспекти од развојот на општеството – антикорупциска политика, владеење на право, тие поглавја коишто ги има во ЕУ. И така почна оваа идеја, кога го нема тој механизам, да го имаме овој механизам. За среќа успеавме да ги имаме двата механизми, односно да имаме две раце коишто нè туркаат во прогрес и кон ЕУ, така што не е алтернатива, туку е комплементарно на процесот на ЕУ-интеграција. Значи, антикорупциската политика, владеењето на правото, сите тие механизми што ги имаат САД, таа поддршка што ќе ја даде на судството ќе ни помогне побрзо да ги постигнеме критериумите за членство во ЕУ. Така што, буквално се две раце коишто ќе ја држат земјата да биде во континуиран развој. Не предвидувам никакво вето. Патот на Северна Македонија е влезен во неповратна фаза кон членство во ЕУ, нема да биде лесен, ќе има многу предизвици, ќе има, многу веројатно, вакви ескалации, меѓутоа тоа се само амплитуди по патот, правецот нема да биде сменет, дефинитивно“,
рече Османи одговарајќи на новинарско прашање на заедничката прес-конфренција во Владата со премиерот Ковачевски, посветена на увоениот план на активности во рамките на стратешкиот дијалог меѓу Северна Македонија и САД.
Во однос на впечатокот дека кога односите со Бугарија се на многу ниско ниво, повторно се интензивира дијалог со САД, Османи рече дека има континуитет во однос на стратешкиот дијалог, а по дефинирање на темите со овој дијалог, се формира работна група која заедно со американската администрација создаде конкретни проекти во краткорочни, среднорочни и долгорочни рамки.
„Во моментот кога созреаја условите сите проекти да бидат прифатени од страна на сите институции, да бидат прифатени од американската страна, поминаа на Влада и веќе ја информираме јавноста дека навистина влегуваме во едно ново поглавје во односите со САД, кога рамката од 2008 за стратешко партнерство преминува во акциски план, станува жив инструмент којшто ќе ги продлабочи односите и сигурно ќе донесе повеќе стабилност, повеќе развој, повеќе економија и културна размена помеѓу нашите две држави“,
рече Османи.