Ситуацијата со Ковид-19 е единствена точка на дневниот ред на третата седница на Советот за безбедност, на која не се поканети партиски лидери. Опозицискиот лидер не присуствуваше на конститутивната седница на Советот, иако Пендаровски му прати покана
Опозициската ВМРО-ДПМНЕ ја искритикува вечерва одлуката на претседателот на државата Стево Пендаровски да свика седница на Советот за безбедност за ситуацијата со коронавирусот, без да ги покани партиските лидери.
„Стево Пендаровски свика проформа Совет за безбедност, без покана за политичките лидери“,
се наведува во соопштението на ВМРО-ДПМНЕ.
Пендаровски, во обраќањето во петокот, соопшти дека на утрешната седница на Советот за безбедност, покрај стандардниот состав на ова тело, ќе биде поканет и министерот за здравство Венко Филипче. Се очекува на седницата да бидат разгледани сите аспекти на ситуацијата со корона вирусот, вклучително со нејзините импликации на политичките процеси во земјава, со оглед на изборниот процес кој е на половина пат.
Од кабинетот на Пендаровски информираат за „360 степени“ дека седницата на Советот за безбедност ќе почне во 16 часот. Единствена точка на дневен-ред е состојбата со Ковид-19 во нашата земја. На седницата, како што велат од претседателскиот кабинет, ќе се разговара и за други прашања кои се поврзани со ширењето на коронавирусот.
Лидерите на политичките партии, во октомври минатата година, токму во резиденцијата на Пендаровски, постигнаа договор за предвремени избори на 12 април, а со тоа и за избор на техничката влада на 3 јануари, со мандат од сто дена. Овој пат, иако Пендаровски најави седница на Советот за безбедност во стандарден состав, ВМРО-ДПМНЕ би требала да има свој претставник на настанот, односно тоа би бил министерот за внатрешни работи Наќе Чулев.
Се очекува на седницата да учествуваат и техничкиот премиер Оливер Спасовски, претседателот на парламентот Талат Џафери, министрите за надворешни работи и за одбрана Никола Димитров и Радмила Шекеринска, началникот на ГШ на Армијата, како и тројцата надворешни членови назначени од Пендаровски: Трајан Гоцевски, Ветон Љатифи и Ненад Марковиќ.
Ова е прва седница на Советот за безбедност по персоналните промени што настанаа во неговиот состав, по изборот на техничката влада. По смената на претседателската функција во мај минатата година, а додека на „Илинденска“ беше политичката влада на Зоран Заев, Пендаровски два пати го свикуваше Советот за безбедност – еднаш за состојбите со аерозагадувањето. Претседателот упати покана до опозицискиот лидер Христијан Мицкоски за негово учество на конститутивната седница на Советот, но тој не одговори на поканата и не присуствуваше на состанокот. Од ВМРО-ДПМНЕ потоа коментираа дек седницата на Советот била формална и со „ниско ниво на класифицираност на податоците“.
„Досега се одржани две седници на Советот за безбедност. Претседателот на ВМРО-ДПМНЕ беше поканет на конститутивната седница, но тој не присуствуваше. На утрешната седница, не се поканети партиски лидери, а ВМРО-ДПМНЕ има претставник преку министерот за внатрешни работи Наќе Чулев, кој е член на Советот“,
велат од претседателскиот кабинет.
Во обраќањето во петокот, Пендаровски изјави дека се надева оти нема да има потреба од прогласување вонредна состојба поради пирење на коронавирусот. Сепак, остави простор да види какви ќе бидат информациите до понеделник, кога ќе заседава Советот за безбедност.