Од Министерството за економија и труд, уште на почетокот на есенската кошничка, најавија дека такви ќе има и за Рамазан и за Велигден
Над 1 100 производи кои беа опфатени со новогодишната кошничка и што беа намалени за 10 отсто, по овие цени ќе се продаваат уште денеска бидејќи од утре завршува мерката што траеше изминатиот месец.
За новогодишната кошничка, која беше формирана на иницијатива на бизнис-секторот, немаше владина одлука. Откако почна да важи, инспекторите од Државниот пазарен инспекторат вршеа само мониторинг на цените во согласност со Законот за заштита на потрошувачите и Законот за трговија, односно ги гледаа цените на производите кои се во новогодишната кошничка и најниските цени на истите производи во последните 30 дена.
На почетокот на новогодишната кошничка, кога во маркетите беа поставени налепница и лого „Помалку трошоци, повеќе за тебе“, јавноста реагираше оти трговците пред да ги намалат производите за 10 отсто, веќе ги зголемиле цените на некои од нив.
По одлука на Владата, инспектори од Државниот пазарен инспекторат (ДПИ) вршеа контроли кај добавувачите, производителите и маркетите со цел да се утврди како се движеле цените на основните прехранбени производи во изминатите месеци. Целта, како што рекоа од ДПИ, е да се направат анализи и да се утврди дали постоело нелогично зголемување на цените кај одредени производи.
Оттаму апелираа до трговците да се придржуваат до акцијата и да не го надоместуваат намалувањето на цените на производите од новогодишната кошничка со зголемување на цените на други прехранбени производи.
И надлежното Министерство за економија и труд апелираше до трговците да се придржуваат до договореното, најавувајќи дека доколку тоа не се случи, ќе се активира одлука за замрзнување на цените или ограничување на маржите.
Министерот за економија и труд Бесар Дурмиши, пред крајот на минатиот месец, поврзувајќи ја оваа кошничка со претходната, есенската, рече дека тогаш заштедата на едно четиричлено семејство била околу 1 300 денари и додаде дека во текот на овој месец очекува таа да биде многу поголема. Очекувањата тој ги темели на тоа што во есенската кошничка имало 73 групи производи, а кај оваа мерка бројката поминува над 1 000 производи.
Од друга страна, Државниот завод за статистика објави дека инфлацијата во декември лани е за 4,4 проценти повисока од истиот период во 2023 година и дека најголем скок има кај храната.
Од Министерството за економија и труд, уште на почетокот на есенската кошничка најавија дека такви ќе има и за Рамазан и за Велигден.