Утре во 14 часот, премиерот Зоран Заев и претседателот на Алтернатива, Африм Гаши, ќе одржат нова средба за тоа дали партијата ќе се приклучи во Владата и парламентарното мнозинство или ќе остане во опозицискиот блок.
Централното претседателство на Алтернатива во петокот го овласти Гаши да почне разговори со сите политички актери, со премиерот и со евентуалниот нов мандатар за да се види каков е нивниот концепт за излез од политичката криза.
На седницата на Централниот одбор на СДСМ, што се одржа исто така во петокот, беше констатирана оставката на Заев од лидерската позиција во партијата, но му беше даден легитимитет да ги води преговорите за парламентарно мнозинство.
Заев во изјава за ТВ Телма во однос на тоа дали во овој момент ќе се повлече од премиерската функција или ќе го послуша барањето на неговиот коалициски партнер ДУИ да го заврши мандатот до 2024 година, одговори дека се’ ќе зависи од преговорите со Алтернатива и со Бугарија.
„Прво треба да се завршат преговорите за парламентарното мнозинство со Алтернатива. Ако тоа се заврши и јавно објави, ќе се направи проценка со стабилно и зголемено парламентарно мноинство, кога ќе се влезе во Парламентот со постапка за избор на влада со Алтернатива, а во зависност од преговорите со Бугарија. Една од најзначајните причини поради кои Алтернатива би влегла во влада е да обезбеди стабилно мнозинство поради почетокот на преговори со ЕУ“,
изјави Заев.